"Azərbaycanın son addımları Avropa İttifaqının bəzi ölkələrini ifşa edib, onların iç üzünü açıb" - Bəhruz Quliyev

"Avropa İttifaqının Azərbaycana qarşı qərəzli münasibəti danılmazdır. Uzun illər Azərbaycana qarşı Ermənistanın işğalçı siyasətini görməzdən gələn Qərb bu gün də ölkəmizin öz suverenliyini bərpa etməsini həzm etmək istəmir. Avropa institutları – ATƏT PA, AŞPA və digər qurumlar insan haqları, seçki bəhanəsi ilə üzərimizə gəlməyə çalışırlar. Bu ilin əvvəlindən AŞPA-da Azərbaycan nümayəndə heyətinin mandatının dondurulmasını Avropanın növbəti demarşı da adlandırmaq olar. Avroparlamentarilər ölkəmizdə keçirilən seçkilər barədə qərəzli rəy verməklə, əslində Azərbaycanın əldə etdiyi uğurlara kölgə salmaq niyyətlərini büruzə verdilər".

Bunu Sonxeber.az-a açıalamasında SƏS Media Qrupun rəhbəri, siyasi analitik Bəhruz Quliyev deyib.

B.Quliyev qeyd edib ki, Azərbaycanın son addımları Avropa İttifaqının bəzi ölkələrini ifşa edib, onların iç üzünü açıb:

"Bu ifşaya qarşı tədbir görmək istəyən həmin ölkələr, xüsusilə Fransa kimi neokolonialist dövlət bəd əməllərini Ermənistan üzərindən genişləndirmək istəyir. Avropa İttifaqının "kuklası" olan indiki Ermənistan hakimiyyəti yeni ağalarına daha çox yarınmaq üçün ən həssas sahələrini onlarla bölüşməkdədir. Azərbaycanla şərti sərhəddə "Avropa mülki müşahidə missiyası" adı altında Fransanın kəşfiyyatının fəaliyyəti bütün beynəlxalq normaların pozulması kimi qiymətləndirilməlidir. Azərbaycan Ermənistanla sülh müqaviləsi bağlamağa çox yaxındır, əgər rəsmi Parisin müdaxiləsi, təxribatçı hərəkətləri olmasa iki Cənubi Qafqaz ölkəsi bir-biri ilə uzlaşa bilərlər. Çox təəssüf ki, İrəvan kənar müdaxilələrə reaksiya verəcək vəziyyətdə deyil, imkanları məhduddur. Avropalı müşahidəçilər isə bundan sui-istifadə edərək bölgədə gərginlik yaratmaq, necə deyərlər, "bulanıq suda balıq tutmaq" istəyirlər. Azərbaycan isə Ermənistandan fərqli olaraq Qərbin bütün planlarını pozmaq gücündədir".

Bəhruz Quliyev vurğulayıb ki, sərhəddə baş verənlər, Gürcüstan seçkiləri və digər təxribatların arxasında dayananların yeganə məqsədi Azərbaycanı onların istədiyi masaya əyləşdirməkdir:

"Bir tərəfdən bəyan edirlər ki, Ermənistanla Azərbaycan arasında sülh müqaviləsinin daha tez imzalanmasının tərəfdarıdırlar, digər tərəfdən isə müxtəlif platformalarda buna qarşı siyasət yürüdürlər. Azərbaycan 44 günlük müharibəni dünya birliyi tərəfindən tanınan ərazilərində apardı, terrorun və separatizmin kökünü də ölkəmizin bir parçası olan Qarabağda kəsdi. Döyüş bölgəsindən yüz kilometrlərlə uzaqdakı şəhər və qəsəbələrimizdə mülki vətəndaşlarımıza, dinc sakinlərimizə Ermənistan ərazilərindən ballistik raketlərlə, qadağan olunmuş kassetli bombalarla hücum edənlərin əsl niyyəti müharibəni bu ölkənin içərilərinə doğru çəkmək olsa da Azərbaycan təmkin nümayiş etdirdi. Bütün bunlara rəğmən Azərbaycan Ermənistanla ikitərəfli təmaslarını davam etdirir, böyük dövlətlərin, super güclərin 25 ildə edə bilmədiyini qəsa zaman kəsiyində sonlandırmaq, sülh müqaviləsinin imzalanmasını təmin edəcək etimad mühitini formalaşdırmaq əzmindədir. Qərbin narahatlığı da bundan qaynaqlanır".

Telegramda izləyin