"Ermənistan konstitusiyasında dəyişiklik edilmədən sülh müqaviləsindən söhbət gedə bilməz" - DEPUTAT

"Oktyabr ayının əvvəlindən Avropa İttifaqının "müşahidəçi"lərinin Azərbaycanla sərhəddə baş çəkməsi halları artıb. Avropa Parlamentinin Azərbaycan əlehinə qəbul etdiyi qətnamənin ardınca "müşahidə" missiyasının fəallaşması açıq-aşkar anti-Azərbaycan siyasətin və qərəzli münasibətin təzahürüdür. Şübhəsiz ki, siyasi etikadan kənar davranış nümayiş etdirən "müşahidəçi"lərin hərəkətləri Azərbaycan üçün heç bir məna kəsb etmədiyi kimi, həm də, qəbuledilməzdir. Azərbaycan və Ermənistan arasında sülh prosesinə töhfə vermək adı altında fəalliyyətə başlayan missiya elan etdiyi hədəflərdən başqa hər bir işlə məşğul olur. Xüsusilə, iki ölkə arasında şərti sərhəddə katalizatorluq edərək, sülh prosesinə və iki ölkə arasında etimad mühitinin yaranmasına mane olurlar. Ermənistan isə, "binokl diplomatiyası"nı özünə fəaliyyət kimi müəyyənləşdirən missiyanın arxasına sığınaraq, qalxan kimi istifadə edir. Əlbəttə, bu Azərbaycan üçün heç də təəccüblü deyil. Ermənistan otuz ilə yaxın başqalarının arxasına sığınaraq, danışıqlar prosesindən necə yayındısa, indi də, o cür yayınmağa çalışır".

Bu fikirləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat bildirib ki, Aİ missiyasının mandatının bitməsinə dörd ay qalıb:

"Bununla belə, Ermənistanla Avropa İttifaqı arasında müqavilədə qeyd olunur ki, müşahidəçilərin (daha doğrusu, kəşfiyyatçıların) mandatı daha iki il müddətinə uzadıla bilər. Cənab Prezident İlham Əliyev Belçika Krallığının yeni təyin olunmuş fövqəladə və səlahiyyətli səfiri Julyen de Freponun etimadnaməsini qəbul edərkən də bu barədə danışaraq vurğulayıb ki, "Azərbaycan-Avropa İttifaqı münasibətlərində etimadsızlıq yaradan məsələlərdən biri də sərhəddə dırnaqarası "Avropa müşahidəçilər missiyasının" müddətinin Azərbaycanın razılığı olmadan, məsləhətləşmədən uzadılmasıdır." Aydın məsələdir ki, Ermənistan "müşahidə missiyası"nı sülh müqaviləsi bağlanana qədər bölgədə saxlamaq fikrindədir. Azərbaycanın isə bu məsələdə mövqeyi qətidir. Ermənistan konstitusiyasında dəyişiklik edilmədən sülh müqaviləsindən söhbət gedə bilməz.

Xüsusilə vurğulamalıyıq ki, Avropa İttifaqının müşahidə missiyasının Ermənistan tərəfdən Azərbaycan sərhədi yaxınlığında fəaliyyətinə ehtiyac yoxdur. Ümumən, sözügedən missiyaya nəinki indi, heç vaxt ehtiyac olmayıb. 2022-ci ilin dekabrından başlayaraq formalaşdırılmasına start verilmiş bu təsisatın, prinsip etibarilə, təxribat törətməklə məşğul olduğu aydın görünür. Yəni birmənalı şəkildə məlumdur ki, bunlar kəşfiyyatçılardır və sərhədin hər bir addımını, hər metrəsini təhlil edir, monitorinqini keçirir və toplanmış arayışları da müvafiq olaraq özlərinin kəşfiyyat qurumlarına ötürürlər. Burada məhz Fransa bayrağı altında olan avtomobil görünür, bu da Fransanın Ermənistandakı səfirliyinin avtomobili də ola bilər. Şübhəsiz ki, bütün bu addımlar sülh müqaviləsinin imzalanmasına mane olmaq üçün atılan ciddi addımlardır".

Deputat vurğulayıb ki, aydın məsələdir ki, qarşılıqlı etimad mühiti formalaşmadıqca və gərginlik doğuracaq faktorlar qaldıqca, Bakı və İrəvan arasında görüntüsü yalnız üfüqdə közərən sülhün reallığa çevrilməsi mümkünsüzdür:

"Bunda itirən tərəfin isə Ermənistan olacağı şübhəsizdir. Ona görə də Avropa İttifaqının regional təhlükəsizliyə, sülh və əmin-amanlığın bərqərar olmasına mane olan missiyasının tezliklə sona çatdırılması üçün diplomatik üsullara əl atılması olduqca vacibdir. Ona görə ki, heç bir siyasi etika və normaya sığmayan "binokl diplomatiyası" həyata keçirən bu missiyanın fəaliyyəti qəbulolunmazdır".

Telegramda izləyin