"Jurnalistikadan sui-istifadə edən şəxslərə bu sahədə fəaliyyət göstərmək qadağan edilməlidir" – AÇIQLAMA

Bakı şəhəri və respublikanın ayrı-ayrı rayonlarında kiçik və orta sahibkarlıq fəaliyyəti ilə məşğul olan şəxslər barəsində rüsvayedici məlumatlar yaymaqla hədələyərək onların pul vəsaitlərini ələ keçirən bir neçə sayt rəhbəri polis əməkdaşları tərəfindən cinayət məsuliyyətinə cəlb edilib.

Bəs görəsən bu əməllərlə məşğul olan şəxslərə jurnalist demək nə dərəcədə doğrudur?

Mövzu ilə bağlı media eksperti Azər Həsrət Sonxeber.az – a açıqlamasında bildirib ki, bu əməlləri törədənlər sadəcə peşədən sui-istifadə edən rəzil insanlardır:

"Hədələmək jurnalistika deyil. Bir şəxs kimisə hədələməklə məşğuldursa, artıq o jurnalistika çərçivəsindən çıxır və həm inzibati, həm də səviyyəsindən asılı olaraq cinayət əməlinə bulaşmış olur. Bu, jurnalistika deyil. Jurnalist əlbəttə araşdırmalıdır, informasiya əldə etməlidir, məlumatı dəqiqləşdirməlidir. Bunun üçün sahibkarlara və ya başqa subyektlərə müraciət edə bilər. İnformasiya əldə etmək haqqında qanuna uyğun olaraq o subyektlər də jurnalistə informasiya verməlidir. Düzdür, verməyə də bilərlər. Bu zaman jurnalist onlara xəbərdarlıq edə bilər ki, əgər informasiya verməsələr hansısa qanunu pozmuş olurlar . Məsələn "Əgər informasiya vermirsizsə, bu qanunun filan maddəsinin pozulması deməkdir." Bunu bu şəkildə demək olar. Amma "Biz sizi rüsvay edəcəyik" deyən şəxs jurnalist deyil. Bu vicdansız bir yanaşmadır. Qələmin şərəfini satmaqdır. Belə işlərlə məşğul olanlar ən rəzil insanlardır. Jurnalist heç vaxt heç kəsi şantaj etməz, hədələməz, qorxutmaz. Ancaq qanuni yollarla informasiya əldə etməyə çalışar. Bunu edə bilmədiyi təqdirdə, yəni, müraciət etdiyi subyekt o informasiyanı verməkdən imtina etsə, sadəcə yazısını yayımlayıb, qeyd etməlidir ki, mən filan subyektə müraciət etdim və o mənə cavab vermədi. Bunun tək yolu budur, şantaj, təhdid deyil. Belə işlərlə məşğul olan adamlara jurnalist demək olmaz. Onlar sadəcə peşədən sui-istifadə edən rəzil insanlardır. Mən illərdir deyirəm ki, bu cür insanların jurnalistika ilə məşğul olması qanunla qadağan edilməlidir. Bunun üçün də media haqqında qanuna xüsusi maddələr əlavə edilməlidir. Jurnalistikadan sui-istifadə edən şəxslərə bu sahədə fəaliyyət göstərmək qadağan edilməlidir. Əgər həkim hipokrat andını pozduqda onun fəaliyyətinə xitam verilirsə, jurnalist də peşə etikasını pozduqda onun da fəaliyyətinə xitam verilməlidir".

Çiçək Sadatova

Telegramda izləyin