"Elektromobillərin müsbət tərəfləri olduğu kimi mənfi tərəfləri də var" – AÇIQLAMA

Dünən Bakıda elektrik enerjisi ilə işləyən avtobus içərisi sərnişin ilə dolu halda yolda qalıb. Sosial şəbəkələrdə yayılan videoda avtobusun yolda qamasına səbəb kimi enerji ehtiyatı qurtarması göstərilib.

"BakuBus" MMC-nin mətbuat xidmətindən bildirilib ki, sosial şəbəkələrdə yayılan video görüntünü müşahidə kameralarında analiz etdikdən sonra, 28.11.2024-cü il axşam saatlarında baş verən hadisənin sürücünün texniki səhvi ilə əlaqəli olduğunu müəyyən edilib.

Bu hadisə sosial şəbəkələrdə müzakirələrə səbəb olub. Görəsən elektriklə işləyən avtobus və maşınların hansı mənfi cəhətləri var?

Mövzu ilə bağlı nəqliyyat eksperti Elməddin Muradlı Sonxeber.az – a açıqlama verib:

"Mən bu avtobuslar ölkəmizə gətirilməzdən əvvəl də demişdim ki, bu məsələ ilə bağlı yüz ölçüb bir biçmək lazımdır. Amma aidiyyatı qurumlar belə bir problemin olmadığını əsaslandırmağa çalışdı. Çünki, elektrikli avtobuslar əsasən şəhər içi istifadə olunur. Bu da o deməkdir ki, onların enerjisi uzun məsafələr üçün deyil. Yəni qısa məsafələrə enerjiləri dözə bilər. Düşünürəm ki, gələcəkdə bu məsələlər mütləq nəzərə alınmalıdır. Çünki bir çox ölkədə də bu avtobuslardan istifadə olunur. Ümumiyyətlə elektromobillərin müsbət tərəfləri olduğu kimi mənfi tərəfləri də var. Məsələn Fransada il ərzində bir-neçə dəfə elektrik avtobuslarının yanması kimi dəhşətli hadisələr baş verib. Bu təkcə elektrik avtobuslarda özünü biruzə verən problem deyil. Elektrik avtomobillər də belə problemlərlə üzləşir. Yadınızdadırsa, keçən il qar yağanda elektrik avtomobil istifadə edən bir çox vətəndaşlar sosial şəbəkələrdə paylaşımlar etdilər ki, adi halda 400 km yol gedirdim, qar yağanda 250 km-dən sonra enerji bitdi. Yəni, bu, elektromobilin xüsusiyyətdir.

Bu avtobuslar istifadə edilirsə, qısa məsafələr üçün nəzərdə tutulmalıdır. Şəhər daxilində son dayanacaqda mütləq əlavə enerjidoldurma məntəqələri quraşdırılmalıdır".

Çiçək Sadatova

Telegramda izləyin