"Mənim "Mavi işığ"ımın qəhrəmanları şirin kökələrdir" - Nuray Nəzərova

Ədəbiyyatın ən saf, təmənnasız, bir o qədər də məsuliyyətli sahəsi uşaq ədəbiyyatıdır. Çünki, ədəbiyyatın məhz bu istiqaməti ilə məşğul olan yazarların üzərinə daha böyük yük düşür. Bu məsuliyyətli işlə məşğul olan yazıçılardan biri də Nuray Nəzərovadır.

Ötən günlərdə gənc yazar Nuray Nəzərovanın ilk qələm təcrübəsi olan "Mavi işıq" pyesi çapdan çıxıb.

Yazıçı, Sonxeber.az-a pyesin yaranma tarixçəsi ilə bağlı açıqlamasında bildirib ki, sözügedən əsəri yazmaq üçün ilham qaynağı "Qoğal" nağlı olub:

"Əsəri yazmazdan öncə Naxçıvan Dövlət Uşaq Teatrının tamaşasında iştirak etmişdim. Həmin tamaşanı gördükdən sonra məndə uşaqlar üçün əsər yazmaq həvəsi yarandı. Bu həvəsi teatrın rejissoru ilə də bölüşdüm. Rejissor bacaracağım barədə mənə motivasiya verdi. Məndə isə açığı ilhamı "Qoğal" nağılından aldım. Lakin, mənim "Mavi işığ"ımın qəhrəmanları qoğal yox, şirin kökələr idi. Özü də bir yox iki dənə. Pyesi tamamladıqdan sonra teatra təqdim etdim. Amma zəif olduğunu qeyd edib yenidən mənə qaytardılar. Mən əsər üzərində yenidən işlədim. Həmin dönəmdə çoxlu Azərbaycan və dünya nağıl qəhrəmanları haqqında öyrəndim. Azərbaycan Uşaq Ədəbiyyatı üçün maraqlı bir əsər yaratmaq istədim və yaratdım da. Pyesi yenidən işləyib teatra təqdim etdikdə bəyəndilər. Düşünürəm ki, kitabı oxuyan balaca dostlarım da mənim kimi nağıllar dünyasına səyahət edə biləcəklər. Qeyd edim ki, kitabda dünya nağıl qəhrəmanlarının obrazlarına da rast gəlmək mümkündür. Kitabı oxuyan bütün balaca dostlarıma uğurlar arzu edirəm".

Vüsalə İbrahimli

Telegramda izləyin