"Polşa prezidentinin Ermənistan-Azərbaycan şərti sərhədinə səfəri, müşahidələr aparması heç də xoşməramlı deyil" - Bəhruz Quliyev

"Avropa İttifaqının da təmsil etdiyi kollektiv Qərbin Ermənistan-Azərbaycan münasibətlərinə yanaşması qərəzlidir, ikili standartlara söykənir və iki ölkə arasında aparılan sülh danışıqlarının ruhuna uyğun deyil. Qərbli emissarların Ermənistana səfərləri, Aİ-nin bu ölkə üzərindən Azərbaycana qarşı açıq düşmənçilik etməsi, mülki müşahidəçi adı altında gələcək müharibə üçün kəşfiyyat xarakterli məlumatların toplanmasına cəhdlər, rəsmi İrəvanın revanşa hazırlanması və digər hərəkətlər, yürüdülən təxribatçı siyasət sülhə yox, müharibəyə təşviqdir".

Bunu Sonxeber.az-a açıqlamasında SƏS Media Qrupun rəhbəri, siyasi analitik Bəhruz Quliyev deyib.

SƏS Media Qrupun rəhbəri bildirib ki, Polşa prezidentinin Ermənistan-Azərbaycan şərti sərhədinə səfəri, müşahidələr aparması heç də xoşməramlı deyil:

"Polşa ABŞ-ın for-postu, Avropanın isə Rusiya ilə ön cəbhəsidir. Qərb bütün planlarını rəsmi Varşava üzərindən qurur. Burada əsaslı səbəblər var və məqsəd də aydındır. Bəlkə də çoxlarına qəribə görünə bilər, amma Avropa söz sahibi olan ölkələri öz ailəsinə daxil etməkdə maraqlı deyil. Çünki onları idarə etmək çətinliklər törədir. Nəzərə alsaq ki, "Qoca qitə"nin ən qocaman üzvlərinin keçmiş socialist ölkələrinə qarşı etimadsızlığı və bir az da qısqanclığı var. Polşa və Ukrayna bu statusda olan iki Şərqi Avropa ölkəsidir. Brüssel Ukraynanı İttifaqa daxil etməzdən əvvəl onun imkanlarını xeyli zəiflətmək planını reallaşdırır. Polşa Avropa İttifaqının üzvü olsa da, onun da zəifləməsi, Brüsseldən asılı vəziyyətə düşməsi üçün çox ciddi addımlar atılmaqdadır. Dudanın sərhəddə müşahidə aparması ilk baxışdan onun Aİ təmsilçisi olaraq bura gəldiyi görüntüsü yaradılır. Əslində isə Polşanın beynəlxalq imicinin xərclənməsindən söhbət gedir. Coğrafi məsafənin böyük olmasına baxmayaraq, Polşa ilə Azərbaycan arasında münasibətlər müstəqilliyiizin ilk illərindən milli maraqlarımıza uyğun olub. 2015-ci ildə Andjey Duda Polşa Respublikasının Prezidenti olduğu vaxtdan etibarən Azərbaycan Prezidenti İlham Əliyev iki dəfə - 2015-ci il - NATO Sammiti, 2017-ci ildə Polşada işgüzar səfərdə olub. Polşa Prezidenti isə 2019-cu ildə Azərbaycana rəsmi səfərə gəlib. Amma bu gün Polşa prezidentini sərhədlərimizə göndərənlərin bu münasibətlərə xələl gətirmək istəyi ortadadır".

Telegramda izləyin