"Heç bir qətnamə və qarayaxma kampaniyası bizi yolumuzdan döndərə bilməz" - DEPUTAT

Xəbər verdiyimiz kimi dekabrın 4-də Bakıda keçirilən tədbir zamanı Avropa İttifaqı (Aİ), eləcə də ABŞ, Böyük Britaniya və İsveçrə səfirlərinin Azərbaycanda "jurnalistlər" və "siyasi fəallar"ın saxlanması bağlı ölkəmizə qarşı növbəti qərəzli bəyanat səsləndiriblər.

Bununla bağlı Sonxeber.az-a danışan deputat Cavanşir Paşazadə bildirib ki, dekabrın 4-də Bakıda keçirilən tədbir zamanı Avropa İttifaqı (Aİ), eləcə də ABŞ, Böyük Britaniya və İsveçrə səfirlərinin Azərbaycanda "jurnalistlər" və "siyasi fəallar"ın saxlanması bağlı verdikləri bəyanat qərəzlidir və ölkəmizə qarşı başladılan qarayaxma kampaniyasının tərkib hissəsidir:

"Bu bəyanatlar Azərbaycan məhkəmə sisteminin müstəqilliyinə açıq şəkildə zərbə vurmaq və məhkəmə proseslərinə müdaxilədir. Əlbəttə bu da hüquqi dövlətin əsas prinsipi olan qanunun aliliyinə zidd addımdır.Qərb Azərbaycana qarşı hər zaman ikili standartlardan çıxış edib. Bu baxımdan Avropa İttifaqının qətnamələri ölkəmizə qarşı siyasi təzyiq hesab edirəm. Bu gün Azərbaycanın öz ərazilərinin suverenliyini tam bərpa etməsi və müstəqil siyasət yürütməsi Avropa İttifaqının qıcıqlandırır. Onlara 90-cı illərin əvvəllərində olduğu kimi əzilmiş, asılı vəziyyətdə olan Azərbaycan lazımdır. 44 günlük Vətən müharibəsində əldə etdiyimiz zəfər qərbin Cənubi Qafqazla bağlı bütün planlarını məhv etdi. 30 ilə yaxın dövrdə əllərində təzyiq kimi istifadə etdikləri Dağlıq Qarabağ münaqişəsini Azərbaycan öz gücünə həll etdi".

Deputat vurğulayıb ki, 44 günlük Vətən müharibəsindən sonra ölkəmizə qarşı aparılan qarayaxma kampaniyası intensivləşib:

"Azərbaycanın öz gücünə ərazi bütövlüyünü bərpa etməsi və COP29 kimi mötəbər beynəlxalq tədbirə uğurla ev sahibliyi edərək adını COP tarixinə yazdırması Avropa İttifaqının və Ermənistanü havadarlıq edən ölkələrin arzularını ürəyində qoydu. Ona görə də bu cür əsassız qətnamələrin verilməsi gözləniləndir. Heç bir qətnamə və qarayaxma kampaniyası bizi yolumuzdan döndərə bilməz".

Telegramda izləyin