Asan yolla varlanmaq arzusu faciə ilə nəticələndi

Muğlanın Bodrum rayonuna bağlı Güvərçinlik məhəlləsində yerləşən içməli su təmizləmə qurğusunun üst hissəsində, meşəlik və dağlıq ərazidə ötən gün saat 21:00 radələrində faciə baş verib.

Sonxeber.az türk mediasına istinadən xəbər verir ki, ilkin məlumatlara görə, bölgəyə dəfinə axtarmaq məqsədilə gələn 49 yaşlı Ali Yağar və onunla birgə olan iki nəfər qeyri-qanuni qazıntı apardıqları zaman torpaq sürüşməsi olub.

Sürüşmə nəticəsində Yağar torpaq altında qalıb. Hadisə barədə məlumat verən yoldaşlarının çağırışı ilə əraziyə xilasedicilər cəlb olunub və Yağarın cansız bədəni çıxarılıb.

Hadisə yerində tibbi müdaxilə aparan səhiyyə işçiləri onun öldüyünü təsdiqləyiblər. Prokurorluq tərəfindən aparılan ilkin araşdırmadan sonra cəsəd müayinə üçün Muğla Məhkəmə-Tibbi Ekspertiza İdarəsinin morquna göndərilib.

Hadisədən sağ çıxan digər iki nəfər ifadələrinin alınması üçün polis qrupları tərəfindən saxlanılıb. Hadisə ilə bağlı araşdırma aparılır.

Telegramda izləyin