Ata mübahisə etdiyi oğlunu ov tüfəngi ilə qətlə yetirdi

Türkiyənin Tekirdağ vilayətinin Kapaklı rayonunda ata ilə oğul arasında baş verən silahlı insident faciə ilə nəticələnib.

Sonxeber.az türk mediasına istinadən xəbər verir ki, 22 yaşlı H.Ş., atası ilə aralarında yaranan mübahisə zamanı güllələnərək həyatını itirib.

Hadisə Kapaklının Yunus Əmrə məhəlləsində, Yavuz Səlim küçəsində yerləşən bir yaşayış kompleksində baş verib. Məlumata görə, H.Ş. daha əvvəl şəxsi mübahisə yaşadığı atası N.Ş. ilə yenidən sözlü mübahisəyə girib. Mübahisədən bir qədər sonra motosikletlə həmin ünvana qayıdan gənc, atasının yaşadığı mənzilə silahla atəş açıb.

Bu zaman ata N.Ş. evdə olan ov tüfəngi ilə eyvandan oğluna atəş açıb. Gənc aldığı güllə yaralarından ağır xəsarət alıb. Hadisəni görən sakinlər dərhal təcili tibbi yardım və polisə məlumat veriblər.

Hadisə yerinə gələn polis əməkdaşları ərazidə təhlükəsizlik tədbirləri görüb. Yaralı H.Ş.-yə ilkin tibbi yardım göstərildikdən sonra Kapaklı Dövlət Xəstəxanasına, oradan isə Çerkezköy Dövlət Xəstəxanasına aparılıb. Lakin həkimlərin səylərinə baxmayaraq, onun həyatını xilas etmək mümkün olmayıb.

Ata N.Ş. polis tərəfindən saxlanılıb. Hadisə ilə bağlı araşdırma davam edir.

Telegramda izləyin