Təmizlik işçisi onu tənqid edən çayxana sahibini qətlə yetirdi

Türkiyənin Adana şəhərinin Seyhan rayonuna bağlı Kocavezi məhəlləsində 19 may tarixində, saat 18:00 radələrində dəhşətli hadisə baş verib.

Sonxeber.az türk mediasına istinadən xəbər verir ki, Seyhan Bələdiyyəsinin təmizlik işçisi 29 yaşlı Tolga Hiçyakmaz, etdiyi təmizliyi bəyənməyən və ona etiraz edən çayxana sahibi, 60 yaşlı Hüsamettin Gözaçık ilə mübahisəyə başlayıb.

Qısa müddət ərzində mübahisə davaya çevrilib. Münaqişə zamanı Tolga Hiçyakmaz, Hüsamettin Gözaçıkı qarın, bel və qol nahiyələrindən bıçaqlayıb. Qanlar içində yerə yıxılan Gözaçıkı hadisə yerinə çağırılan təcili yardım əməkdaşları Seyhan Dövlət Xəstəxanasına çatdırıb. Lakin həkimlərin səylərinə baxmayaraq, o, bir gün sonra dünyasını dəyişib.

Hadisədən sonra qaçan şübhəli, Cinayət Axtarış Şöbəsinin əməkdaşları tərəfindən evinə edilən basqınla saxlanılıb. Polis bölməsində dindirilən Tolga Hiçyakmaz ifadəsində bildirib: "Mənə davamlı söyüş söyür, etiraz edirdi. Üzərimə bıçaq çəkdi, mən də əlindən alıb onu bıçaqladım".

İlkin istintaqdan sonra məhkəməyə çıxarılan Tolga Hiçyakmaz barəsində həbs qətimkan tədbiri seçilib. Hadisə ilə bağlı araşdırma davam edir.

Telegramda izləyin