"8 Noyabr" Elektrik Stansiyası ölkənin enerji potensialını daha da gücləndirəcək" - DEPUTAT

"Azərbaycan Prezidentinin iştirakı ilə Mingəçevir şəhərində "8 Noyabr" Elektrik Stansiyasının açılışı olub. 1880 meqavat gücündə olan bu stansiya Azərbaycanın daxili enerji tələbinin ödənilməsinə xüsusi töhvə verəcək"

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, "8 Noyabr" Elektrik Stansiyası daxili tələbatı tam ödəməklə yanaşı, həm də ölkəmizin ixrac imkanlarının artmasına şərait yaradacaq, Mingəçevirin yalnız Azərbaycanda deyil, bütövlükdə Cənubi Qafqazın energetika mərkəzi olan statusunu gücləndirməsinə xidmət edəcək:

"Son illər ölkəmizdə enerji siyasəti sahəsində həm bərpaolunan, həm də ənənəvi enerji mənbələrinin səmərəliliyinin artırılması istiqamətində mühüm addımlar atıb. Xüsusilə də Qarabağın və Şərqi Zəngəzurun yaşıl enerji zonası elan edilməsi, günəş və külək elektrik stansiyalarının təməlinin qoyulması, hidroenerji potensialının reallaşdırılması, böyük həcmli beynəlxalq investisiya müqavilələrinin imzalanması və regional enerji təhlükəsizliyinə töhfə verən layihələrin icrası bu sahənin prioritet olduğunu təsdiqləyir.

Cənab prezident İlham Əliyevin müdrik, uzaqgörən və məqsədyönlü siyasəti nəticəsində ölkənin enerji resurslarından səmərəli istifadə təmin olunur. Ən önəmlisi isə Azərbaycanın yaşıl enerji potensialı, xüsusilə bərpa olunan enerji sahəsində əldə olunan nailiyyətlər, Avropanın enerji təhlükəsizliyində əhəmiyyətli rol oynayacaqdır. Bu gün İtaliya və Çin ilə enerji, texnologiya və infrastruktur sahələrində mövcud olan strateji tərəfdaşlıq əlaqələri Azərbaycanın uzunmüddətli milli maraqlarına və strateji hədəflərinə nail olunmasında mühüm əhəmiyyət daşıyır".

Deputat vurğulayıb ki, "8 Noyabr" Elektrik Stansiyası Azərbaycan Respublikasının Prezident İlham Əliyevin 2022-ci ildə imzaladığı Sərəncama əsasən inşasına başlanıldı:

"Bu böyük layihə rekord sayılacaq müddətdə - cəmi iki il ərzində uğurla başa çatdırılıb. Layihənin hazırlanması və icrasında Azərbaycanın mühəndisləri əsas rol oynayıb. Texniki həllər dünya təcrübəsi ilə uzlaşdırılaraq, yerli və beynəlxalq ekspertlərin iştirakı ilə həyata keçirilib.8 Noyabr elektrik stansiyası ölkəmizin ən böyük elektrik stansiyasıdır".

"8 Noyabr" Elektrik Stansiyasının açılış mərasimindəki çıxışında cənab prezident İlham Əliyev vurğuladığı kimi bu stansiyada tətbiq olunan ən son texnoloji həllər və dünyanın aparıcı enerji istehsalı avadanlıqları sayəsində yanacaq sərfiyyatı əhəmiyyətli dərəcədə azaldılıb, faydalı iş əmsalı artırılıb və ətraf mühitə təsir minimuma endirilib. Bu baxımdan "8 Noyabr" Elektrik Stansiyası həm ekoloji, həm də iqtisadi səmərəliliyi ilə seçilən nümunəvi enerji layihəsi hesab olunur və ölkənin enerji siyasətində yeni mərhələnin başlanğıcını simvolizə edir. Bir sözlə "8 Noyabr" Elektrik Stansiyası ölkənin enerji potensialını təbii olaraq daha da gücləndirəcək, enerji sisteminin səmərəliliyini artıracaq. Ən önəmlisi isə Mingəçevirin nəinki Azərbaycanın, bütövlükdə Cənubi Qafqazın energetika mərkəzi statusunu daha da gücləndirəcək".

Telegramda izləyin