Rəfdə başqa, kassada fərqli qiymət: Alıcı nə etməlidir? - AÇIQLAMA

Alıcılar çox hallarda alış-veriş zamanı məhsulun rəfdə göstərilən qiyməti ilə kassadakı qiyməti arasında fərqlə qarşılaşa bilirlər. Bəs, belə hallarda bu uyğunsuzluğun məsuliyyəti kimdədir və müştəri haqlarını necə qorumalıdır? Marketlərdə qiymət etiketlərindəki bu cür ziddiyyətlərə qarşı nə kimi nəzarət mexanizmləri mövcuddur?

Mövzu ilə bağlı Sonxeber.az-a Marketinq və İctimaiyyətlə əlaqələr üzrə məsləhətçi Səfər Aslanov danışıb.

O, açıqlamasında qeyd edib ki, belə hallar çox zaman insani və ya texniki səhv nəticəsində baş verir:

"Böyük marketlərdə minlərlə SKU (Stock Keeping Unit) olur. Hər məhsulun öz adı, kodu, çəkisi, ölçüsü və qiyməti var. Gün ərzində çox sayda məhsulun qiyməti dəyişə bilər. Bu zaman qiymət sistemdə yenilənir, amma rəfdəki etiketlər – yəni qiymət kağızları – bəzən vaxtında dəyişdirilmir. Bu isə rəf və kassa qiymətləri arasında fərqə səbəb olur.
Əslində bu məsuliyyət marketin öz üzərindədir. Market rəhbərliyi rəf və kassa qiymətlərinin uyğun olmasına nəzarət etməlidir. Amma nəzərə almaq lazımdır ki, məhsulların sayı minlərlədir, və bəzən planoqrama uyğun düzülmüş rəflərdə qiymətlərin hamısını eyni anda dəyişmək çətindir. Merçendayzerlər bu işi görən əməkdaşlardır və onların işi çox məhsullu mağazalarda kifayət qədər çətin və operativ olmalıdır.
Əksər hallarda marketlər qəsdən alıcıları aldatmaq istəmir. Belə hallar çox zaman insani və ya texniki səhv nəticəsində baş verir. Böyük satış şəbəkələri üçün alıcını itirmək, etibarını qırmaq maddi cəhətdən daha böyük zərərlə nəticələnir. Ona görə də, marketlər bu cür uyğunsuzluqları aradan qaldırmağa çalışırlar.
Bu cür qiymət fərqləri bəzən istəmədən baş verir və bu sahədə həm texniki nəzarət, həm də əməkdaşların diqqəti vacibdir. Alıcı isə belə hallarda sakit və diqqətli şəkildə haqlı tələbini irəli sürməlidir".

Vüsalə İbrahimli

Telegramda izləyin