AZAL təyyarələrinin Ermənistan üzərindən uçuş marşrutu niyə dəyişilib?

Adətən, Bakıdan Naxçıvana və əks istiqamətdə olan mülki aviareyslər Ermənistanın Vayotsdzor və Başkənd vilayətləri üzərindən həyata keçirilir. Lakin son zamanlar bəzi reyslərin Ermənistanın Sünik vilayəti üzərindən keçdiyi müşahidə olunub. Ermənistan Mülki Aviasiya Komitəsi (MAK) "Azərbaycan Hava Yolları"na (AZAL) məxsus bəzi təyyarələrin Ermənistan üzərindən keçən uçuş marşrutlarının dəyişdirilməsi səbəblərini izah edib.

Oxu.Az-ın verdiyi məlumata görə, qurum bu barədə "Sputnik Ermənistan"ın sorğusunu cavablandırıb.

MAK-ın cavabında qeyd olunub ki, mülki təyyarələrin uçuşları beynəlxalq meyarlar və prosedurlar çərçivəsində tənzimlənir:

"Təyyarələrin yönləndirilməsi - hava şəraiti, pilotların müraciətləri, təyyarələr arasında minimal məsafənin qorunması kimi amillərlə, eləcə də hava məkanında müvəqqəti məhdudiyyətlərlə bağlı qəbul edilən adi və beynəlxalq səviyyədə tanınmış təcrübədir. Bu amillər səbəbindən bəzi hallarda təyyarələr planlaşdırılmış marşrutdan kənara çıxa bilər".

Komitə vurğulayıb ki, Azərbaycan mülki təyyarələri bu praktikanın istisnası deyil və onların marşrutdan yayınmasının səbəbləri də yuxarıda qeyd olunan hallar ola bilər.

Bildirilib ki, belə hallarda hərəkətə Ermənistanın hava hərəkətinə nəzarət orqanları və hava hücumundan müdafiə qüvvələri ilə razılaşdırılmış şəkildə, mövcud təhlükəsizlik və nəzarət prosedurlarına uyğun olaraq qərar verilir.

Komitənin məlumatına görə, İranın hava məkanında dövri məhdudiyyətlər səbəbilə tranzit uçuşların coğrafiyası dəyişib və bu da Ermənistan ərazisindən keçən reyslərin sayının artmasına səbəb olub.

Sonda MAK qeyd edib ki, bütün bu qərarlar sırf texniki, peşəkar və təhlükəsizlik baxımından qəbul olunur və siyasi motivlər daşımır.

Telegramda izləyin