Meşəlik ərazidə başına zibil torbası keçirilmiş kişi meyiti tapıldı - FOTO

İstanbulun Sarıyer rayonunda, yol kənarındakı meşəlik sahədə başına qara zibil torbası keçirilmiş və yapışqan lentlə bərkidilmiş, təxminən 25 yaşlarında olduğu güman edilən kişi meyiti aşkarlanıb.

Sonxeber.az türk mediasına istinadən xəbər verir ki, hadisə yerinə gələn prokuror və kriminalistik qrupların araşdırmasından sonra meyit Məhkəmə-Tibbi Ekspertiza İdarəsinin morquna aparılıb.

İlkin məlumatlara görə, yoldan keçən bir vətəndaş meşəlik sahədə yerə uzanmış, hərəkətsiz vəziyyətdə olan şəxsi görərək dərhal hüquq-mühafizə orqanlarına məlumat verib. Əraziyə çağırılan polis və təcili tibbi yardım əməkdaşları ətrafı təhlükəsizlik lenti ilə bağlayaraq müayinələrə başlayıblar. Tibbi qrupun ilkin yoxlaması nəticəsində həmin şəxsin həyatını itirdiyi müəyyən olunub.

Hadisə yeri ekspertləri təxminən 25 yaşlarında olan kişinin başında yapışqan lentlə bərkidilmiş qara zibil torbası olduğunu müəyyən ediblər. Meyitin yaxınlığında rus dilində yazılmış bir qeyd və içərisində mobil telefon, İstanbul nəqliyyat kartı, pul və müxtəlif şəxsi əşyalar olan qara qulplu çanta da aşkarlanıb.

Prokurorun ilkin araşdırmalarından sonra şəxsin boğularaq öldürüldüyü ehtimal olunur. Meyit daha geniş ekspertiza üçün Məhkəmə-Tibbi Ekspertiza İdarəsinə aparılıb.

Polis hadisənin intihar, yoxsa qətl olduğunu müəyyənləşdirmək məqsədilə araşdırmalara başlayıb.

Telegramda izləyin