Məşhur reper avtomobil qəzasına düşdü

Məşhur amerikalı reper Lil Pump (əsl adı Qazzi Qarsia) ağır avtomobil qəzasına düşüb. 24 yaşlı musiqiçinin maşını ad günündən cəmi bir neçə gün əvvəl yağış səbəbindən sürüşkən yolda aşıb. İfaçı əmindir ki, yalnız İlahi möcüzə sayəsində sağ qalıb.

Sonxeber.az xəbər verir ki, reper hadisə yerindən görüntüləri "Instagram" səhifəsində paylaşıb.

Onun sözlərinə görə, qəzanın səbəbi güclü leysan olub, bu da avtomobilin idarəetmədən çıxmasına gətirib. Maşın aşdıqdan sonra Lil Pump pəncərəni sındıraraq əzilmiş nəqliyyat vasitəsindən çıxa bilib.

Faciədən sarsılan reper etiraf edib ki, ölümdən bir addım uzaqda olub:

"Dostlar, bir neçə gün əvvəl həyatımı itirmək üzrəydim. Tanrı var! Yağış yağanda maşın sürməyin. Sağlamlıq sərvətdir. Çıxmaq üçün pəncərəni sındırmalı oldum. Əgər bunu etməsəydim, indi sağ olmazdım", - deyə o bildirib.

Lil Pump qeyd edib ki, qəza dörd gün əvvəl baş verib və hələ də yaşadıqlarının təsiri altındadır.

Qeyd edək ki, epataj davranışı və təxribatçı mətnləri ilə tanınan ifaçı hadisədən sonra ad günü planlarını dəyişib:

"Ad günümdə Tanrıya bütün nemətlərinə təşəkkür üçün kilsəyə gedəcəyəm", - deyə vurğulayan reper, artıq həyatı və sağlamlığı daha çox qiymətləndirdiyini qeyd edib.

Qazzi Qarsia 2017-ci ildə "Gucci Gang" hiti ilə məşhurlaşıb. Bu mahnı ona dünya şöhrəti və milyonlarla dinləyici qazandırıb. Karyerası ərzində o, Kanye Uest və DJ Khaled kimi ulduzlarla əməkdaşlıq edib.

Telegramda izləyin