Kiçik nasazlıq böyük problemə çevrildi: Bakıda yerləşən avtoservis sürücünü 6500 manat ziyana saldı - ŞİKAYƏT

Bakıda yerləşən "Pitstop" avtoservis barəsində şikayət var.

Belə ki, Sonxeber.az -a müraciət edən İslam Qəniyev adlı vətəndaş bildirir ki, servis onu zərərə salıb daha sonra isə həmin zərəri qarşılamaqdan boyun qaçırıb:

"Üç ay əvvəl avtomobilimi cəmi 50 manatlıq nasazlığa görə servisə təhvil vermişdim. Orada xərci 3300 manata çıxardılar. Mən 3000 manat ödədim, amma maşını təmir etmək əvəzinə daha da xarab etdilər. Bununla bağlı polisə müraciət etdim. Bundan sonra isə xarab ehtiyat hissələri ilə avtomobili guya təmir edib mənə qaytardılar.

Servisin müdiri mənə söz verdi ki, maşını başqa yerdə təmir etdirim, çəkilən zərəri isə o qarşılayacaq. Mən də avtomobili başqa servisə apardım. Artıq bir aydır ki, əvvəlki servis tərəfindən xarab edilən hissələrin təmiri bitmir və bu müddətdə 6500 manat xərcim çıxıb.

Bunu "Pitstop"un müdirinə bildirdim, amma o mənə ‘bizlik deyil’ cavabını verdi. Artıq başa düşmüşəm ki, onlar məni sadəcə yola verirlər və zərərimi qarşılamayacaqlar"

Sözügedən servislə əlaqə saxladıq. Lakin suallarımıza daha sonra cavab verəcəklərini bildirdilər.

Telegramda izləyin