"Azərbaycan imzalanmış sənədlərə sadiqdir, amma Ermənistanın daxili siyasəti və xarici təzyiqlər bu prosesi poza bilər" - POLİTOLOQ

Azərbaycan Prezidenti İlham Əliyev Səudiyyə Ərəbistanının "Əl-Ərəbiyyə" telekanalına müsahibə verib.

Sonxeber.az xəbər verir ki, dövlət başçısının müsahibəsi avqustun 26-da həmin telekanalda yayımlanıb.

Müahibədə müxbirin: "Cənab Prezident, Siz Ermənistanın konstitusiyasına edilməli düzəlişi qeyd etdiniz. Hazırda sülh haqqında bəhs etdiyimiz zaman düşünürəm ki, əgər Ermənistanda hər hansı daxili siyasi dəyişiklik baş verərsə, bu, həmin prosesə xələl gətirəcəkmi?" sualına Prezident İlham Əliyev: "Bunu söyləmək çətindir, yalnız ehtimal edə bilərəm. Ümid edirəm ki, prosesə heç bir müdaxilə olmayacaq. Lakin yenə də məndə yüz faiz zəmanət yoxdur, çünki Ermənistanın daxili siyasəti barədə tam məlumatlı deyiləm. Bilirik ki, gələn yay Ermənistanda parlament seçkiləri keçiriləcək. Həmçinin bilirik ki, onlar yeni konstitusiya layihəsi üzərində İşləyirlər. Lakin güclü xarici müdaxilə olarsa, bəli, bu, razılaşmaları poza bilər. Amma bu, Ermənistanın özü üçün çox zərərli olar, çünki Vaşinqtonda sənədlərin kim tərəfindən imzalanmasından asılı olmayaraq, onlar Ermənistanın adından Ermənistan lideri tərəfindən imzalanıb. Əgər orada hər hansı dəyişiklik baş verərsə və imzalanmış sənəddən geri addım atılarsa, bu, Ermənistan ilə ABŞ arasındakı münasibətləri ciddi şəkildə pisləşdirər. Bu, yalnız ABŞ-a aid deyil, beynəlxalq ictimaiyyət, Avropa İttifaqı, Türkiyə və ərəb ölkələrindəki dostlarımız da bu prosesi dəstəklədilər", - deyə cavab verib:

"Prezident İlham Əliyevin "Əl-Ərəbiyyə"yə müsahibəsi əslində Bakının bölgədəki diplomatik üstünlüyünü nümayiş etdirir" - bunu Sonxeber.az -a açıqlama verən politoloq Tural İsmayılov deyib:

"Əliyev açıq şəkildə göstərir ki, Azərbaycan imzalanmış sənədlərə sadiqdir, amma Ermənistanın daxili siyasəti və xarici təzyiqlər bu prosesi poza bilər. Burada əsas məqam odur ki, məsuliyyət tam şəkildə Yerevanın üzərinə qoyulur – sənədlər Ermənistan lideri tərəfindən imzalanıbsa, sabah geri addım atmaq Ermənistanın beynəlxalq mövqelərinə ağır zərbə olacaq.

Əliyev ABŞ, Avropa İttifaqı, Türkiyə və ərəb ölkələrinin dəstəklərini sadalayaraq göstərir ki, bu razılaşma artıq təkcə Bakı ilə Yerevan arasında deyil, geniş beynəlxalq konsensusun mövzusudur. Yəni Ermənistan hansısa daxili seçki oyunu və ya Konstitusiya dəyişikliyi bəhanəsi ilə sənəddən geri çəkilsə, təkcə Azərbaycanla deyil, ABŞ və Avropa ilə də münasibətlərini pisləşdirəcək.

Müsahibənin diplomatik mahiyyəti bundan ibarətdir: Bakı özünü sabit və öhdəliklərinə sadiq tərəf kimi təqdim edir, Ermənistan isə etibarsızlıq təhlükəsi ilə qarşı-qarşıya qoyulur. Əliyevin "ümid edirəm müdaxilə olmayacaq, amma yüz faiz zəmanət yoxdur" ifadəsi həm ehtiyatlı optimizmdir, həm də xəbərdarlıqdır – məsuliyyət Ermənistanın üzərindədir və nəticə etibarilə onların atacağı addım bütün regionda siyasi balansı müəyyən edəcək".

Çiçək Sadatova

Telegramda izləyin