"Paşinyan Türkiyə ilə münasibətləri normallaşdırmağı İrəvan üçün "nəfəs yastığı" hesab edir" - AÇIQLAMA

Sentyabrın 1-də Çinin Tiencin şəhərində Türkiyə Prezidenti Rəcəb Tayyib Ərdoğanla Ermənistanın baş naziri Nikol Paşinyan arasında görüş keçirilib.

İki ölkə rəhbərinin görüşü Şanxay Əməkdaşlıq Təşkilatının Çində keçirilən sammiti çərçivəsində baş tutub.

Görüşün təfərrüatı hələlik açıqlanmayıb.

"Ərdoğan–Paşinyan görüşünün Tiencində, Şanxay Əməkdaşlıq Təşkilatının sammiti fonunda baş tutması təsadüfi deyil. Türkiyə həm regionun əsas güc mərkəzi, həm də Ermənistan üçün real təhlükəsizlik və iqtisadi alternativdir. Ankara uzun müddətdir İrəvana mesaj verir ki, Cənubi Qafqazda sabitliyin açarı Qarabağ məsələsinin tam həllindən və Azərbaycanın suverenliyinin tanınmasından keçir"- bunu Sonxeber.az -a açıqlama verən politoloq Tural İsmayılov deyib:

"Paşinyan isə Qərbə yaxınlaşmaq xəttini davam etdirsə də, Türkiyə ilə münasibətləri normallaşdırmağı İrəvan üçün "nəfəs yastığı" hesab edir. Ermənistanın iqtisadi çıxış yolları məhduddur və Türkiyə bazarı ilə sərhədlərin açılması ölkə üçün ciddi imkanlar yarada bilər. Ancaq bu prosesdə əsas şərt Azərbaycanın maraqlarının nəzərə alınmasıdır.

Görüşün təfərrüatının açıqlanmaması göstərir ki, hələlik tərəflər ictimaiyyət qarşısında radikal mövqelərdən yayınmaq istəyirlər. Ərdoğan diplomatiyada nəticə yönümlü yanaşmaya üstünlük verir və o, bu məsələni Bakının maraqlarını əsas götürərək dəyərləndirəcək. Paşinyan isə daxildəki müxalifət təzyiqlərinə baxmayaraq, regionda yeni reallığı qəbul etməyə məcburdur.

Nəticə olaraq, Tiencin görüşü Cənubi Qafqazda yeni danışıqlar mərhələsinin başlanğıcı ola bilər. Əgər Ermənistan real addımlar atarsa, bu dialoq həm Ankaraya, həm Bakıya, həm də ümumilikdə regiona fayda gətirəcək. Amma Paşinyanın tərəddüdləri davam edərsə, görüş sadəcə simvolik xarakter daşıyacaq".

Telegramda izləyin