"Sülh gündəliyinin təşviqi Azərbaycanın beynəlxalq reputasiyasını daha da möhkəmləndirir" - AÇIQLAMA

Ölkəmizin suverenliyini və ərazi bütövlüyünü bərpa etməsindən sonra regionda təşviq etdiyimiz sülh gündəliyi xarici siyasətimiz üçün yeni üfüqlər açır və onun daha qlobal xarakter daşıması baxımından mühüm amil rolunu oynayır.

Bu barədə Prezident İlham Əliyevin "İnkişaf və təhlükəsizliyin rezonansı: AQEM-in institusional transformasiyasında regional əməkdaşlıq və idarəetmə" adlı AQEM-in Beyin Mərkəzləri Forumunun 13-cü sessiyasının iştirakçılarına müraciətində deyilir.

Dövlət başçısı qeyd edib ki, keçən ay Azərbaycanla Ermənistan arasında sülh sazişinin paraflanması həm bölgə, həm də daha geniş coğrafiya üçün əlverişli imkanlar yaradır.

"Prezident İlham Əliyevin AQEM-in Beyin Mərkəzləri Forumuna ünvanladığı müraciət Azərbaycanın post-münaqişə dövründə formalaşdırdığı sülh gündəliyinin strateji mahiyyətini bir daha ortaya qoyur" - bunu Sonxeber.az -a açıqlama verən politoloq Tural İsmayılov deyib:

"Ölkəmizin suverenliyini və ərazi bütövlüyünü tam bərpa etməsi yalnız daxili sabitlik deyil, həm də regional diplomatiyada yeni mərhələnin başlanğıcıdır. Sülh sazişinin paraflanması Azərbaycan diplomatiyasının praqmatik və uzaqgörən yanaşmasının nəticəsidir. Bu sənəd Cənubi Qafqazda uzunmüddətli sabitliyin təmin olunması üçün real hüquqi baza yaradır.

Azərbaycanın təşəbbüsü ilə irəli sürülən regional əməkdaşlıq platformaları artıq qlobal miqyasda maraq doğurur. Bu, ölkəmizin xarici siyasətinin yalnız regional deyil, qlobal aktor kimi mövqeyini gücləndirir. İlham Əliyevin çıxışında vurğulanan "inkişaf və təhlükəsizliyin rezonansı" ifadəsi Azərbaycanın yeni diplomatik fəlsəfəsini simvolizə edir. Bu fəlsəfə güc üzərində deyil, hüquq və qarşılıqlı fayda prinsipləri üzərində qurulub.

Sülh gündəliyinin təşviqi Azərbaycanın beynəlxalq reputasiyasını daha da möhkəmləndirir. Bu, həm də ölkəmizin sülhpərvər imicinin konkret diplomatik nəticələrlə təsdiqlənməsidir. Ermənistanla paraflanmış sənəd təkcə ikitərəfli münasibətlərin normallaşması deyil, həm də regionda yeni iqtisadi və nəqliyyat imkanlarının açılması deməkdir. Azərbaycan diplomatiyası münaqişədən sonra konstruktiv və inklüziv yanaşma nümayiş etdirir. Bu, beynəlxalq aktorlar tərəfindən yüksək qiymətləndirilir və dəstəklənir.

Forumda səsləndirilən fikirlər Azərbaycanın beyin mərkəzləri ilə əməkdaşlığa verdiyi önəmi də göstərir. Bu, siyasətin elmi əsaslarla formalaşmasına yönəlmiş strateji yanaşmadır. Prezidentin müraciəti Azərbaycanın sülh gündəliyinin yalnız bölgə üçün deyil, daha geniş coğrafiya üçün də transformativ gücə malik olduğunu təsdiqləyir".

Telegramda izləyin