Əyləncə məkanında dəhşət: Əvvəlcə keçmiş sevgilisini, sonra özünü öldürdü - VİDEO

İzmirin Urla rayonunda dəhşətli hadisə baş verib. Əyləncə məkanında keçmiş sevgilisi tərəfindən güllələnən qadın həyatını itirib, daha 2 nəfər isə yaralanıb.

Sonxeber.az türk mediasına istinadən xəbər verir ki, hadisədən sonra qaçan şübhəli evində ölü halda tapılıb. Cinayət anının təhlükəsizlik kamerası görüntüləri də üzə çıxıb.

İddialara görə, Ramazan Ümit Görgülü (34) keçmiş sevgilisi Selin Angunun (33) olduğu əyləncə məkanına gələrək üzərində gətirdiyi silahla atəş açıb. Onun güllələri Selin Angundan başqa, yanında olan Ü.A. (23) və D.T.-yə (27) də dəyib.

Hadisə yerindən qaçan şübhəli ilə bağlı əraziyə polis, təcili yardım və xilasetmə cəlb olunub. Yaralılar təcili tibbi yardım maşını ilə Urla Dövlət Xəstəxanasına çatdırılıb. Həkimlərin bütün müdaxilələrinə baxmayaraq, Selin Angunun həyatını xilas etmək mümkün olmayıb.

Polisin araşdırması nəticəsində hadisənin törədicisinin Ramazan Ümit Görgülü olduğu müəyyənləşdirilib. Onun ünvanına keçirilən əməliyyat zamanı şübhəli döş qəfəsindən güllə yarası almış halda ölü tapılıb.

Cinayətlə bağlı araşdırma davam edir. Təhlükəsizlik kamerasına düşən görüntülərdə Görgülünün əlində silahla əyləncə məkanına yaxınlaşaraq əvvəlcə qapıdakı şəxslərə, daha sonra keçmiş sevgilisi Selin Anguna atəş açdığı, sonra isə qaçaraq uzaqlaşdığı əks olunub.

Telegramda izləyin