"İzlənmə" uğruna təhlükə: Cinsiyyət partisi azyaşlının həyatını riskə atdı

Türkiyədə keçirilən bir cinsiyyət partisi sosial mediada böyük müzakirələrə səbəb olub.

Sonxeber.az türk mediasına istinadən xəbər verir ki, çəhrayı və mavi şarlarla bəzədilmiş iki yük maşını ilə təşkil olunan tədbirdə təhlükəli anlar yaşanıb. Maşınlardan biri sürətlə ailənin önündə dayanaraq körpənin cinsiyyətini elan etdiyi anda, valideynlərin yanındakı azyaşlı uşaq az qala altında qalırdı.

Başlanğıcda ailə daxilində sadə bir qeyd etmə formasında keçirilən bu tip tədbirlərin son illərdə şou xarakterli nümayişlərə çevrildiyi vurğulanır. Təyyarədən boya püskürdülməsi, yaxtalarda atəşfəşanlıq, sualtı balon partlatma və hətta "Squid Game" temalı partilər artıq bir "ailə ənənəsi" deyil, gösteriş yarışına dönüb.

Mütəxəssislərin sözlərinə görə, bu qədər şişirtmənin əsas səbəbi sosial şəbəkələrdə daha çox "bəyənilmə" və "izlənmə" qazanmaq istəyidir. Lakin uşaqların belə həyati təhlükə ilə üzləşdiyi son görüntülər, cinsiyyət partilərinə qarşı tənqidlərin daha da artmasına səbəb olub.

Telegramda izləyin