Üzərində "polis" yazılı gödəkçə olan şəxs güllələnərək öldürüldü

İstanbulun Arnavutköy rayonunda gecə saatlarında silahlı hücum baş verib.

Sonxeber.az türk mediasına istinadən xəbər verir ki, kimliyi bilinməyən şəxs və ya şəxslər, küçənin ortasında 30 yaşlarında olduğu ehtimal edilən bir kişiyə silahla atəş açıblar. Başından vurulan şəxs hadisə yerində həyatını itirib.

Hadisə, saat 01:30 radələrində Arnavutköyün Xəstəxana məhəlləsində, Hadımköy İstanbul küçəsində qeydə alınıb. İddialara görə, naməlum şəxslər avtomobillə hadisə yerinə gələrək, səbəbi hələlik məlum olmayan atış açıb. Hücumdan sonra yaralanan şəxs qan içində yerə yıxılıb. Onun üzərində "polis" yazılı gödəkçə olduğu müəyyən edilib. Şübhəlilər isə gəldikləri avtomobillə hadisə yerindən qaçıblar.

Hadisəni görən sakinlərin məlumatı əsasında əraziyə polis və təcili tibbi yardım briqadaları göndərilib. Həkimlərin ilkin yoxlamasında hücuma məruz qalan şəxsin hadisə yerində öldüyü təsdiqlənib.

Daha sonra xüsusi təyinatlı polis əməkdaşları ərazidə geniş təhlükəsizlik tədbirləri görüb. Polis və hadisə yeri araşdırma qrupları isə cinayətlə bağlı ətraflı araşdırma aparıb. Ölən şəxsin meyiti müayinədən keçirilməsi üçün Yenibosna Ədli Tibb İnstitutu morquna aparılıb.

Hazırda polis qaçan şübhəlilərin yaxalanması üçün əməliyyat-axtarış tədbirlərini davam etdirir.

Telegramda izləyin