Tələbə yataqxanasının liftində qəza baş verib - VİDEO

Ankarada Kredi və Yurtlar Qurumu (KYK) nəzdində fəaliyyət göstərən Hacı Bayram Veli tələbə yataqxanasında baş verdiyi iddia olunan lift qəzası dövlət yataqxanalarında təhlükəsizlik məsələlərini yenidən gündəmə gətirib.

Sonxeber.az türk mediasına istinadən xəbər verir ki, Hacettepe Universitetinin hazırlıq şöbəsində təhsil alan bir tələbə qız sosial şəbəkədə paylaşdığı videoda, yataqxanada tək olduğu halda mindiyi liftdə qəza yaşadığını bildirib. Onun sözlərinə görə, lift 5-ci mərtəbədən -4-cü mərtəbəyə düşüb:

"İkinci mərtəbədə lift dayandı, işıqlar söndü. Bir neçə dəqiqə qaranlıqda qaldım. Liftin içindəki təhlükəsizlik telefonunun işləmədiyini gördüm. Elektrik kəsintisi olmuşdu. Daha sonra -4-cü mərtəbəyə düşdüm, sanki tunel kimi bir yerə düşdüyümü deyə bilərəm", – deyə tələbə açıqlayıb.

Hadisə zamanı panikaya düşdüyünü bildirən tələbə otaq yoldaşını və 112 Təcili Yardım Mərkəzini axtardığını, qısa müddətdə isə xilasedicilər, təcili tibbi yardım və polis əməkdaşlarının gəldiyini qeyd edib:

"Onların hamısına təşəkkür edirəm, çox maraq göstərdilər. Xəstəxanaya getmək istəmədim, amma 112 əməkdaşları məni tək qoymadı."

Gənc qız, KYK yataqxanalarında daha əvvəl də oxşar lift qəzalarının baş verdiyini xatırladaraq, məsul şəxslərə lazımi tədbirlərin görülməsi üçün çağırış edib.

Telegramda izləyin