"Dövlət vətəndaşların hüquqlarını müdafiə etmək, onların bilik və bacarıqlarını inkişaf etdirməyə xüsusi önəm verir" - DEPUTAT

"Cəmiyyətin inkişafında insan hüquq və azadlıqlarının qorunması, vətəndaşların hüquqi savadlılığının artırılması və siyasi mədəniyyətin formalaşdırılması dövlətimizin əsas prioritetlərindəndir. Demokratik dövlət quruculuğu və vətəndaş cəmiyyətinin möhkəmlənməsi üçün insanların hüquqlarını bilməsi, onlardan istifadə etməsi, həmçinin ictimai-siyasi proseslərdə fəal iştirakı mühüm şərtdir".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, son illərdə ölkəmizdə hüquqi maarifləndirmə proqramlarının mütəmadi olaraq həyata keçirilməsi, təhsil müəssisələrində vətəndaşlıq və hüquq dərslərinin genişləndirilməsi, qeyri-hökumət təşkilatlarının və ictimai birliklərin fəaliyyətinə dəstək göstərilməsi bu istiqamətdə atılan vacib addımlardandır:

"Milli Məclis öz növbəsində qanunvericilik təşəbbüsləri ilə vətəndaşların hüquq və azadlıqlarının daha da möhkəmlənməsinə xidmət edən qərarlar qəbul edir.

Təbii ki, bu proses əhəmiyyətli olduğu qədər, daha geniş baxış bucağı tələb edən mövzudur. Burada dövlət tərəfindən irəli sürülən müsbət yanaşmalar bütün konteksti əhatə edə bilməz. Yəni, dövlətin irəli sürdüyü təşəbbüsləri vətəndaşlar lazımı səviyyədə qiymətləndirməli, onun məhsuldarlığını artırmaq üçün çalışmalı və şəxsi bilik-bacarıqları ilə maksimum inkişafa dəstək olmalıdır.

Eyni zamanda, cəmiyyətin hüquqi və siyasi mədəniyyət səviyyəsinin artırılması üçün elektron maarifləndirmə platformalarının genişləndirilməsi, regionlarda ictimai müzakirə və təlimlərin keçirilməsi, gənclərin dövlət idarəçiliyində və ictimai-siyasi həyatda iştirak imkanlarının daha da artırılması istiqamətində işlər həyata keçirilir. Dövlət vətəndaşların hüquqlarını müdafiə etmək, onların bilik və bacarıqlarını da inkişaf etdirməyə xüsusi önəm verir. Bu isə vətəndaş cəmiyyətinin möhkəmlənməsi və ölkəmizin dayanıqlı inkişafı üçün mühüm zəmin yaradır".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "İnsan hüquq və azadlıqlarının müdafiəsi, vətəndaşların hüquqi, siyasi mədəniyyət səviyyəsinin yüksəldilməsi, sosial və siyasi fəallığının artırılması" mövzusuna uyğun olaraq dərc edilir.

Telegramda izləyin