Ardıcıl baş verən üç dəhşətli hadisədən sonra rayon sakinləri ayağa qalxdı

Zonguldak vilayətinin Çaycuma rayonunda baş verən ardıcıl üç hadisə bölgəni gündəmə gətirib.

Sonxeber.az türk mediasına istinadən xəbər verir ki, qısa müddət ərzində üç fərqli kənddə yaşanan hadisələr ictimaiyyətdə böyük səs-küy yaradıb.

İlk hadisə rayonun Ahatlı kəndində baş verib. 16 yaşlı B.T. qarın ağrısı şikayəti ilə xəstəxanaya müraciət edib. Müayinə zamanı onun doğum sancısı çəkdiyi müəyyən olunub. Doğuma alınan azyaşlının körpəsinin ana bətnində öldüyü müəyyənləşib. B.T. xəstəxanada müalicə altına alınıb. Rayon prokurorluğu hadisə ilə bağlı araşdırma başladıb. Qızın şikayətçi olmadığı, körpənin atasının müəyyənləşdirildiyi və onun ifadəsinin alınacağı bildirilib.

İkinci hadisə Koramanlar kəndində baş verib. Kənd sakinləri heyvanlarını otardığı zaman təxminən 4 metr dərinlikdəki su quyusunun içərisində meyit görərək dərhal jandarmaya xəbər veriblər. Əraziyə gələn hüquq-mühafizə orqanları quyunun ətrafını təhlükəsizlik lentilə bağlayıb və araşdırmalara başlayıblar. Meyitin gənc bir qıza aid olduğu müəyyən edilib. İlkin məlumatlara görə, cansız bədənin Kızılbel kəndində 5 gündür axtarılan H.A.-ya aid olduğu ehtimal edilir.

Üçüncü və ən son hadisə isə Kızılbel kəndində qeydə alınıb. 71 yaşlı Hüseyn Derin, eyni evdə yaşadığı keçmiş gəlini Gönül Karakökü ov tüfəngi ilə vuraraq öldürüb. Cinayətdən sonra Hüseyn Derinin bərbərə gedərək saçını kəsdirdiyi, daha sonra isə yoldan keçən jandarma qrupuna könüllü şəkildə təslim olduğu bildirilib.

Qısa zaman ərzində qonşu üç kənddə baş verən bu hadisələr Çaycuma rayonunda dərin təlaş və narahatlıq yaradıb. Hadisələrlə bağlı istintaq davam edir.

Telegramda izləyin