Tikinti sahəsində qorxulu hadisə – Yükqaldıran kran inşaat meydanına aşdı

İstanbulun Acıbadem bölgəsində, Albayrak Qrupuna məxsus tikinti sahəsində səhər saatlarında qorxu dolu anlar yaşanıb. Tikinti sahəsində istifadə olunan yükqaldıran kran naməlum səbəbdən tarazlığını itirərək inşaat meydanının üzərinə aşıb.

Sonxeber.az türk mediasına istinadən xəbər verir ki, hadisə zamanı böyük bir gurultu ilə yerə çırpılan kran ətrafda təşvişə səbəb olub, tikinti sahəsində ciddi maddi ziyan meydana gəlib. Xoşbəxtlikdən, hadisə nəticəsində ölən və ya xəsarət alan olmayıb.

Hadisə şahidlərinin sözlərinə görə, kran aşdıqdan sonra ətrafda toz buludu yaranıb və bir neçə dəqiqəlik panika yaşanıb.

Hazırda hadisənin başvermə səbəbləri ilə bağlı araşdırma aparılır.

Telegramda izləyin