Avtobus sürücüsünü daşla öldürdülər

İtaliya 2-ci Basketbol Liqasının (Serie A2) altıncı turunda keçirilən Sebastiani Rieti – Pistoia qarşılaşması qonaq komandanın 88-73 hesablı qələbəsi ilə başa çatıb. Lakin görüşdən sonra baş verən faciəvi hadisə qələbənin önünə keçərək ölkə idman gündəmini sarsıdıb.

Sonxeber.az türk mediasına istinadən xəbər verir ki, Rieti şəhərində baş tutan oyunun ardından evə dönmək üçün avtobusa minən Pistoia tərəfdarları, şəhər çıxışında ev sahibi komandanın radikal azarkeşlərinin daşlı hücumuna məruz qalıb. Məlumata görə, polis müşayiəti ilə yola çıxan avtobus, Rieti sərhədini keçdikdən az sonra daş yağışına tutulub.

Hücum zamanı atılan daşlardan biri avtobusun şüşəsini qıraraq ikinci sürücüyə dəyib. Ağır xəsarət alan sürücünün həyatını xilas etmək mümkün olmayıb.

Faciədən sonra Pistoia Basket klubu rəsmi saytında yayımladığı bəyanatla hadisəni kəskin şəkildə qınayıb və həyatını itirən sürücünün ailəsinə başsağlığı verib.

İtaliya Baş naziri Giorgia Meloni də sosial media hesabında paylaşım edərək böyük kədər keçirdiyini bildirib:

"Bu dəhşətli xəbər qarşısında sözlər yetərsizdir. Pistoia Basket azarkeşlərinin avtobusuna edilən hücum və sürücünün həyatını itirməsi qəbuledilməzdir. Bu, vəhşi zorakılıq aktıdır. Qurbanın ailəsinə başsağlığı verirəm. Hücumun məsul şəxslərinin müəyyən olunacağına və ədalətin təmin ediləcəyinə inanıram".

İtaliya hüquq-mühafizə orqanları hadisənin təşkilatçılarını müəyyən etmək üçün genişmiqyaslı istintaqa başlayıb. Hücumun təşkil olunmuş fanat qrupu tərəfindən həyata keçirildiyi iddia olunur. İdman ictimaiyyəti isə bu vəhşiliyə sərt reaksiya verib.

Telegramda izləyin