"Ənənəvi media rəqəmsal təzyiqlərə baxmayaraq, öz aktuallığını qoruyur" - AÇIQLAMA

Noyabrın 6-sı Azərbaycanda Televiziya və Radio işçilərinin Peşə Bayramı Günü kimi qeyd olunur. Bu tarix milli televiziya və radio yayımının inkişafında mühüm mərhələ hesab olunur. Müasir dövrdə isə media sahəsi sürətlə dəyişir, rəqəmsal platformalar ənənəvi medianın fəaliyyətinə birbaşa təsir göstərir. Bəs, Azərbaycan televiziyası və radiosunun rəqabət qabiliyyətini qoruması üçün dövlət səviyyəsində hansı islahatlar həyata keçirilir?

Mövzu ilə bağlı Sonxeber.az-a politoloq Tural İsmayılov danışıb.

O, açıqlamasında qeyd edib ki, Azərbaycan televiziyası və radiosunun rəqabət qabiliyyətinin qorunması istiqamətində dövlətin həyata keçirdiyi islahatlar strateji və mərhələli xarakter daşıyır:

"İlk növbədə, media siyasətində əsas məqsəd informasiya təhlükəsizliyinin təmin olunması və milli dəyərlərin qorunmasıdır. Prezident İlham Əliyevin rəhbərliyi ilə qəbul edilən yeni "Media haqqında" Qanun bu istiqamətdə əsaslı dönüş yaratdı. Bu qanun medianın şəffaflığını, peşəkarlığını və ictimai məsuliyyətini artırmaq məqsədi daşıyır. Eyni zamanda Medianın İnkişafı Agentliyinin fəaliyyəti nəticəsində televiziya və radio orqanlarına həm texniki, həm də məzmun baxımından dəstək mexanizmləri formalaşıb.
Bu məqsədlə telekanalların texnoloji yenilənməsi, HD və onlayn yayım imkanlarının genişləndirilməsi dövlət proqramlarında prioritet kimi müəyyənləşdirilib. Dövlət həmçinin regionlarda yerli yayım orqanlarının inkişafına xüsusi diqqət yetirir ki, bu da milli informasiya məkanının balansını qoruyur. Peşəkar kadr hazırlığı, jurnalist etikası və rəqəmsal bacarıqlar üzrə təlimlər isə medianın keyfiyyət meyarlarını yüksəldir.

Bütün bu islahatlar göstərir ki, dövlət televiziyanı və radionu sadəcə yayım vasitəsi kimi deyil, milli təhlükəsizliyin və ideoloji sabitliyin dayağı kimi qiymətləndirir. Ənənəvi media rəqəmsal təzyiqlərə baxmayaraq, öz aktuallığını məhz bu strateji yanaşma sayəsində qoruyur. Gələcək mərhələdə süni intellekt və rəqəmsal analitika ilə inteqrasiya da nəzərdə tutulur. Bu, Azərbaycanın media sistemini həm modern, həm də milli kimliyinə sadiq saxlamaq üçün ən effektiv yoldur. Nəticədə Azərbaycan televiziyası və radiosu təkcə informasiya mənbəyi yox, həm də milli ideyanın daşıyıcısı kimi inkişaf edir".

Vüsalə İbrahimli

Telegramda izləyin