Almaniyada türk vətəndaşının faciəvi ölümü: Yardım etdiyi şəxs tərəfindən qətlə yetirildi

Almaniyada çalışan türk vətəndaşı Mazlum Akar köməyə ehtiyacı olduğunu deyən şəxsə yardım etdiyi üçün həyatını itirib.

Sonxeber.az türk mediasına istinadən xəbər verir ki, hadisə, Akarın işlədiyi müəssisəyə "acam" deyərək daxil olan və psixoloji problemləri olduğu bildirilən bir alman vətəndaşına yemək verməsindən sonra baş verib.

Məlumata görə, yemək yedikdən sonra müəssisədə bir müddət oturan şəxs yuxuya gedib. İş yerinin bağlanma vaxtı çatdıqda Mazlum Akar onu nəzakətlə oyatmaq istəyib. Elə bu anda həmin şəxs cibindən çıxardığı bıçaqla Akarı dəfələrlə bıçaqlayıb və ağır yaralayıb. Hadisə yerinə çağırılan təcili tibbi yardımın müdaxiləsinə baxmayaraq, Mazlum Akarın həyatını xilas etmək mümkün olmayıb.

Polis şübhəlinin saxlanıldığını və hadisə ilə bağlı istintaqın davam etdirildiyini açıqlayıb.

Telegramda izləyin