"ABŞ həm Rusiya ilə dolayısı diplomatik kanalları açıq saxlayır, həm də Kiyevin manevr imkanlarını daraldır" - AÇIQLAMA

Vaşinqton administrasiyası müzakirələrin gedişində Ukraynadakı münaqişənin həlli üçün yeni ABŞ planında dəyişikliklər etməyə hazırdır.

Məlumatı Axios portalı yayıb. Bildirilir ki, bunun üçün Kiyevin ABŞ təkliflərini ciddi qəbul etməsi lazımdır. Portala danışan ABŞ rəsmisinin sözlərinə görə, Vaşinqton planı tərəflərlə məsləhətləşmələr əsasında dəyişdirilə bilən "canlı sənəd" kimi görür: "Lakin rəsmi şəxs bunun ədalətli təklif olduğunu israr etdi və ABŞ Ukraynanın müzakirələrdə ciddi və gecikmədən iştirak etməsini gözləyir".

"Vaşinqtonun "planı dəyişməyə hazırıq" mesajı ilk baxışda yumşaq görünür, amma mahiyyətdə ciddi siyasi şərt gizlənir: ABŞ Kiyevdən prosesi ləngitmədən masaya oturmasını tələb edir" , - bunu Sonxeber.az -a açıqlama verən politoloq Tural İsmayılov deyib:

"Bu, açıq şəkildə göstərir ki, administrasiya bu müharibənin sonsuz davamını öz strateji maraqları ilə uyğun hesab etmir. "Canlı sənəd" ifadəsi də təsadüfi deyil – Vaşinqton planı yekun paket kimi yox, tərəflərin reaksiyasına görə formalaşdırılan dəyişkən çərçivə kimi təqdim edir.

Bununla ABŞ həm Rusiya ilə dolayısı diplomatik kanalları açıq saxlayır, həm də Kiyevin manevr imkanlarını daraldır. Siyasi tona diqqət edək: rəsmi şəxs planın "ədalətli" olduğunu xüsusi vurğulayırsa, bu, Vaşinqtonun layihəni artıq baza sənədi kimi gördüyünü göstərir. Burada "ədalət" Ukraynanın istəkləri ilə yox, ABŞ-ın regional hesablamaları ilə ölçülür.

Kiyevdən gözlənilən "ciddi iştirak" tələbi isə Zelenski administrasiyasına təzyiq siqnalıdır: ya danışıqlara real şəkildə qoşulursunuz, ya da siyasi dəstəyin tonunda dəyişikliklər baş verə bilər. Bu cümlələr Vaşinqtonun Ukraynanı mövqeyini yumşaltmağa hazırladığını göstərir.

Hadisələrin gedişi belə mesaj verir: ABŞ Rusiya ilə tam qarşıdurma kursunu davam etdirmək istəmir və Avropa təhlükəsizliyi üçün daha idarəolunan model qurmağa çalışır. Kiyevin bu prosesi qəbul etməsi isə yalnız masa arxasında yox, daxili siyasətdə də risklidir. Ancaq geosiyasi reallıq dəyişir və Vaşinqton artıq bu dəyişimin mərkəzində öz şərtlərini diktə etməyə başlayıb".

Telegramda izləyin