"Üç Qardaş - 2021" təliminin əhəmiyyəti ilə bağlı türkiyəli generaldan AÇIQLAMA

Xəbər verdiyimiz kimi, Bakıda ilk dəfə olaraq Azərbaycan, Türkiyə və Pakistanın xüsusi təyinatlı qüvvələrinin "Üç Qardaş - 2021" birgə beynəlxalq təlimi keçiriləcək. Birgə təlimin əsas məqsədi döyüş əməliyyatlarının aparılması zamanı dost və tərəfdaş ölkələrin xüsusi təyinatlı bölmələrinin qarşılıqlı fəaliyyətinin təkmilləşdirilməsi, sülh və müharibə dövründə əməliyyatlara hazırlanması, bilik və təcrübə mübadiləsinin aparılmasıdır. "Üç Qardaş - 2021" beynəlxalq təlimi sentyabrın 20-dək davam edəcək.

Bu təlimin əhəmiyyəti ilə bağlı Sonxeber.az-a Türkiyənin Azərbaycandakı keçmiş hərbi attaşesi, ehtiyatda olan general Yücel Karauz danışıb.

O, ilk öncə sözügedən təlimin adının məhz "Üç Qardaş" olmasının anlamından danışıb:

"Bunu belə izah etmək lazımdır ki, Pakistan Türkiyəyə, "Qurtuluş Savaşı" və 1974-cü ildə baş verən "Kipr Hərəkatı" daxil olmaqla, hər zaman çox böyük maraq və dəstək göstərib. Eyni zamanda, Pakistan Azərbaycanın torpaqlarının işğalı zamanı dünyaya Azərbaycanın haqq səsinin çatdırılması ilə bağlı çox böyük səy göstərib, Ermənistana etdiklərinin yanlış olduğunu bildirərək, torpaqların sürətlə boşaldılması zərurətini vurğulayıb. 44 günlük Vətən müharibəsi zamanı da Pakistan daim Azərbaycanın yanında olub.

Bir sözlə, Türkiyə, Azərbaycan və Pakistan arasında tarix boyu davam edən bu qardaşlıq münasibətlərinin "Üç Qardaş - 2021" təlimləri çərçivəsndə nümayiş etdirilməsi böyük anlam daşıyır və bu, gələcək fəaliyyətlər üçün də çox böyük mesajlar ehtiva edən əməkdaşlıqdır".

Yücel Karauz, həmçinin, "Üç Qardaş - 2021" birgə təlimin məhz Bakıda keçirilməsinin də əhəmiyyətli olduğunu vurğulayıb:

"İkinci önəmli perspektiv isə bu təlimlərin Bakıda, Azərbaycanın koordinatorluğu ilə keçirilməsi ilə bağlıdır. 10 noyabr bəyannaməsindən sonra sözündə durmayan və sülh müqaviləsi imzalamaq istəməyən Ermənistana, bölgə ölkələrinə və dünyaya verdiyi mesaj baxımıdan Azərbaycanın haqq savaşına Türkiyə və Pakistanın qoşulmasıyla bərabər, təlimlərin Bakıda keçirilməsi çox önəmlidir".

Aysel Yusifqızı

Telegramda izləyin