Borc üstündə düşən davada 8 nəfər yaralandı

İstanbulun Esenyurt rayonunda iki qrup arasında borc-alacaq məsələsi zəminində baş verən kütləvi dava qanlı sonluqla nəticələnib.

Sonxeber.az türk mediasına istinadən xəbər verir ki, hadisə saat 21:00 radələrində Esenyurtun Çınar məhəlləsində, 1426-cı küçədə qeydə alınıb. Məlumata görə, bir iş yerində borc məsələsinə görə başlayan mübahisə qısa müddətdə böyüyərək küçədə davam edib. Tərəflər arasında yaranan dava zamanı silahdan atəş açılıb və həmçinin bıçaqlanma hadisələri baş verib.

Məlumat əsasında əraziyə çox sayda polis və təcili tibbi yardım briqadası göndərilib. Yaralılar ilk tibbi müdaxilədən sonra xəstəxanaya aparılıb.

Dava iştirakçıları polis tərəfindən saxlanılıb. Hadisədən sonra küçə təhlükəsizlik lentləri ilə bağlanıb, kriminalistika qrupu ərazidə araşdırma aparıb.

Məsələ ilə bağlı istintaq davam edir.

Telegramda izləyin