"Bakı artıq müharibə mərhələsinin qapanmasını deyil, sülh mərhələsinin institusionallaşmasını prioritet sayır" - AÇIQLAMA

Cənubi Qafqaz regionunda sülh qonşular arasında rifah və inkişafa gətirməlidir.

Bunu Azərbaycan Prezidentinin köməkçisi - Azərbaycan Prezident Administrasiyasının Xarici siyasət məsələləri şöbəsinin müdiri Hikmət Hacıyev Brüsseldə jurnalistlərə açıqlamasında bildirib.

"Azərbaycan üçün müharibə və münaqişə başa çatıb. Biz sülhü möhkəmləndirməliyik", - "Eutoday" H.Hacıyevin sözlərini sitat gətirir.

O qeyd edib ki, Azərbaycan və Ermənistan arasında sülh regiona rifah və inkişaf gətirməli, həmçinin qonşular arasında qarşılıqlı əlaqələri möhkəmləndirməlidir.

"Eutoday" qeyd edir ki, prezident köməkçisinin sözlərinə görə, Şərqlə Qərb, eləcə də Şimal və Cənub arasında əlaqələr genişləndikcə Ermənistan "dalana dirənmiş ölkə"dən tranzit dövlətə çevrilə bilər.

"Hikmət Hacıyevin Brüsseldə verdiyi mesajlar Azərbaycanın postmünaqişə strateji xəttinin mahiyyətini dəqiq əks etdirir" , - bunu Sonxeber.az -a açıqlama verən politoloq Tural İsmayılov deyib:

"Bakı artıq müharibə mərhələsinin qapanmasını deyil, sülh mərhələsinin institusionallaşmasını prioritet sayır
Bu yanaşma Cənubi Qafqazda geosiyasi risklərin azalması üçün açar faktordur.
Azərbaycan üçün sülh sadəcə silahların susması yox, kommunikasiya xətlərinin açılmasıdır.
Regionda rifahın yaranması yalnız qarşılıqlı iqtisadi asılılıqla mümkün ola bilər.
Ermənistanın "dalana dirənmiş ölkə" statusundan tranzit dövlətə çevrilməsi ideyası strateji baxımdan real ssenaridir.
Lakin bu dönüş yalnız İrəvanın revanşist mövqelərdən tam imtina etməsi ilə mümkündür.
Əks halda regional layihələrdə iştirak Ermənistan üçün açıq qapı olaraq qalmaz.
Şərq–Qərb və Şimal–Cənub dəhlizlərinin genişlənməsi Azərbaycanın regional oyunçu rolunu daha da gücləndirir.
Bu prosesin mərkəzində məhz sabitlik və uzunmüddətli təhlükəsizlik dayanır.
Brüsseldə səslənən bu açıqlamalar həm də Avropaya ünvanlanmış siyasi mesajdır.
Azərbaycan göstərir ki, regionda yeni müharibə yox, yeni iqtisadi arxitektura qurmaq niyyətindədir.
Top indi Ermənistan tərəfdədir və seçim çox sadədir: ya inteqrasiya, ya da izolyasiya.
Reallıq ondan ibarətdir ki, sülh yolu seçilərsə, qazanclı tərəf yalnız Azərbaycan yox, bütün Cənubi Qafqaz olacaq."

Telegramda izləyin