"Laçının dinc siyasi yolla Azərbaycana qaytarılması ölkəmizin gücünün ən parlaq göstəricilərindəndir" - DEPUTAT

"Laçının işğalı Azərbaycan tarixində ən ağır səhifələrdən biri olmuş, minlərlə insan doğma yurd-yuvasından didərgin düşmüş, bölgə uzun illər düşmən nəzarətində qalmışdı. Bu strateji əhəmiyyətli rayonun azad olunması isə Azərbaycanın siyasi iradəsinin, diplomatik çevikliyinin və prinsipial mövqeyinin nəticəsi kimi tarixə düşdü. Azərbaycan Respublikasının Prezidenti, Ali Baş Komandan İlham Əliyevin qətiyyətli və uzaqgörən siyasəti sayəsində Laçın hərbi əməliyyatsız, tam şəkildə dinc yolla Vətənə qaytarıldı. Bu fakt həm regionda sülhün qorunması baxımından, həm də Azərbaycanın beynəlxalq hüquqa əsaslanan mövqeyinin təsdiqi kimi müstəsna əhəmiyyət daşıyır".

Bu sözləri Sonxeber.az-a Milli Məclisin deputatı Aydın Hüseynov danışıb.

O, açıqlamasında qeyd edib ki, Laçının azad edilməsindən sonra bölgədə genişmiqyaslı quruculuq və bərpa işləri sürətlə həyata keçirilir:

"İllərlə viran qalmış ərazilər yenidən dirçəldilir, müasir infrastruktur layihələri ardıcıl şəkildə reallaşdırılır. Şəhərin yenidən planlaşdırılması, yaşayış massivlərinin inşası, sosial obyektlərin tikintisi və kommunikasiya xətlərinin bərpası bölgədə həyatın tamamilə yeni səviyyədə qurulmasına imkan yaradır. Bu işlərin fonunda ən möhtəşəm layihələrdən biri kimi Laçın şəhərində beynəlxalq standartlara uyğun təyyarə limanının inşası xüsusi qeyd olunmalıdır. Bu hava limanı həm Laçının strateji əhəmiyyətini artırır, həm də regionun turizm, iqtisadi və logistika imkanlarının genişlənməsinə şərait yaradır.

Bu gün Laçında görülən işlər təkcə tikinti və bərpadan ibarət deyil, burada həyat yenidən canlanır, təhlükəsizlik, rifah və davamlı inkişaf üçün möhkəm bünövrə yaradılır. Laçının dinc siyasi yolla Azərbaycana qaytarılması və ardınca həyata keçirilən böyük layihələr ölkəmizin gücünün, birliyinin və gələcəyə inamının ən parlaq göstəricilərindəndir".

Vüsalə İbrahimli

Telegramda izləyin