Beynin mənfi fikirlərə meylli olmasının əsas səbəbləri nədir? - AÇIQLAMA

"Beynimizin mənfi fikirlərə daha çox meyilli olmasının əsas səbəbi, sağqalma mexanizminin işləməsidir. Buna instinkt də deyilir. İbtidai dövrdə insan üçün təhlükəni daha tez və daha güclü dərk etmək sağ qalması üçün vacib idi. Bütün neqativ fikirlərin altında sağ qalmaq instinkti dayanır. Beyin nəzarəti sevir və onun üçün təhlükə hər an mövcud ola bilər. Psixoloji tərəfdən bu artıq pozuntu şəkli alırsa, yəni daim narahatlıq, mənfi və narahat edən fikirlərdən beynin yayınmaması müşahidə olunursa, demək ki, düşüncələrə nəzarət hissi itib".

Bu sözləri Sonxeber.az-a psixoloq Samirə Bağırova danışıb.

O, açıqlamasında qeyd edib ki, mənfi düşüncələr və narahatlıqlar o zaman insandan uzaqlaşmır ki, beyin həmin fikri fakt kimi, real kimi qəbul edir:

"Ələlxüsus insan həyatı boyunca tənqidlər, qorxular, narahatlıqlar, uşaq ikən valideynlərinin sərt davranışları vəs. kimi yalnız mənfi təcrübələrlə üzləşibsə, bu artıq beynin insanı qorumaq üçün "səhv proqramlaşması" deməkdir. Mənfi düşüncələr və narahatlıqlar o zaman insandan uzaqlaşmır ki, beyin həmin fikri fakt kimi, real kimi qəbul edir. Bunu müxtəlif terapevtik seanslar və koqnitiv səbəblərə nəzər salmaqla — yəni beynin məlumatı necə qəbul edib işləməsinə baxmaqla — fikri yayındırmaq və onu yeni tərzdə sistemləşdirmək mümkündür. Bu zaman beyindəki amiqdalada təhlükə siqnalı azalır və nəzarət hissi vəziyyəti ələ alır. Nəzarət hissi gücləndikcə qərarvermə, planlama, özünüidarəetmə, düşüncə və davranışa nəzarət də güclənir. Sağlam eqonun "mən idarə edirəm" hissi də buradan qaynaqlanır".

Vüsalə İbrahimli

Telegramda izləyin