20 min manata gətirdiyi gəlin qaçdı, ata intihar etdi

Çanaqqalanın Biga rayonunda yaşanan faciə böyük rezonans doğurub.

Sonxeber.az türk mediasına istinadən xəbər verir ki, psixoloji problemləri olan oğlunu evləndirmək istəyən Ramazan Gümüşsoy, Cəzayirdən 500 min lirə (təxminən 20 min Azərbaycan manatı) ödəyərək gətirdiyi gəlin səbəbi ilə həyatını itirib.

Sabah qəzetinin məlumatına görə, mebel mağazasında həyat yoldaşı ilə birlikdə çalışan Ramazan Gümüşsoy uzun müddət oğluna uyğun bir həyat yoldaşı tapmağa çalışırdı. Son illər bölgədə geniş yayılmağa başlayan "xarici gəlin" vasitəçiliyi ilə əlaqə quraraq, Cəzayirdə yaşayan Hadil Ayad adlı qadının Türkiyəyə gətirilməsi üçün ailə 500 min lirə ödəyib.

Hadil Ayad sentyabr ayında Bigaya gəlib və 27 oktyabrda Muammer Gümüşsoy ilə rəsmi nikaha daxil olub. Lakin toy mərasimindən bir neçə həftə sonra Cəzayirli gəlin yoxa çıxıb. İddiaya görə, toyda taxılan qızılları və pulları toplayaraq evdən ayrılan Ayaddan bir daha xəbər alınmayıb.

Evdə gəlinini tapa bilməyən Muammer Gümüşsoy vəziyyəti ailəsinə bildirərək baş verənləri açıqlayıb. Aldanıldığını anlayan və toy üçün aldığı borcların ağırlığı altında qalan Ramazan Gümüşsoy yaşananları qüruruna sığışdıra bilməyərək dərin psixoloji sarsıntı keçirib. Bir neçə gün əvvəl evdə heç kəsin olmadığı vaxt özünü tavana asaraq həyatına son qoyub.

Ramazan Gümüşsoyun ölümü ilə bağlı Biga Cumhuriyyət Baş Prokurorluğu Cəzayirli gəlin Hadil Ayad haqqında "dələduzluq" iddiası ilə istintaqa başlayıb. Qaçan gəlinin harada olduğu isə hələ də məlum deyil.

Telegramda izləyin