İstanbulda qadına qarşı şiddət: Kəməri it boyunluğu kimi taxıb küçədə gəzdirdilər - VİDEO

İstanbulun Beyoğlu rayonunda 29 oktyabrda sosial şəbəkələrdə yayılan videoda bir kişinin bir qadının boğazına kəməri it boyunluğu kimi taxdığı, "Miyavla", "Qadınlar mum kimidir, onları necə tərbiyə etsən, elə də olar", "Qadınlar həmişə itaət edər" kimi ifadələr işlədərək küçədə irəlilədikləri görüntülər ölkədə geniş rezonans yaratmışdı.

Sonxeber.az türk mediasına istinadən xəbər verir ki, İstanbul Baş Prokurorluğu tərəfindən hazırlanmış iddianamədə videodakı şəxslərin Uras U. və Nurgül B. olduqları müəyyən edilib və hər iki şəxs sənəddə "şübhəli" qismində yer alıb.

İddianamədə qeyd olunur ki, Uras U. küçədə hərəkət etdikləri zaman Nurgül B.-nin boğazına kəməri it boyunluğu kimi keçirib və qadını alçaldıcı ifadələrlə hərəkət etməyə məcbur edib. Videonun Uras U. tərəfindən sosial mediada paylaşılması və hadisənin şübhəlilər arasında əvvəlcədən qurulmuş ssenari əsasında həyata keçirilməsi onların fiziki və psixoloji şiddət tətbiq etdiyini göstərdiyi bildirilib.

Sənəddə videonun "cəmiyyətin bir hissəsi olan qadınlara qarşı şiddətə təşviq edən, düşmənçilik və nifrət hissini artıran" mahiyyət daşıdığı vurğulanıb. Videonun açıq məkanda çəkilməsi və hər kəsə açıq hesabda paylaşılması səbəbilə hadisənin cəmiyyət üçün təhlükə yaratdığı qeyd olunub.

İfadəsində videonun "zarafat məqsədli" olduğunu bildirən Uras U., qadınlara qarşı alçaltma niyyəti olmadığını deyib. Digər şübhəli Nurgül B. isə Uras U. ilə 3 ay əvvəl tanış olduqlarını, onun özünü sosial media fenomeni kimi təqdim etdiyini və videoda oynamağı maddi ehtiyac səbəbilə qəbul etdiyini söyləyib.

Hazırlanan iddianamədə hər iki şübhəli — Uras U. və Nurgül B. üçün zəncirvari şəkildə "xalqı kin və düşmənçiliyə açıq-aşkar təhrik etmək" ittihamı ilə 1 il 10 aydan 7 il 10 aya qədər həbs cəzası tələb edilib.

Şübhəlilərin məhkəməsi İstanbul Asliye Cinayət Məhkəməsində başlayacaq.

Telegramda izləyin