"Koreya-Azərbaycan münasibətləri perspektivli və uzunmüddətli əməkdaşlıq üçün möhkəm təməl üzərində inkişaf edir" - AÇIQLAMA

"1992-ci ildə diplomatik əlaqələrin qurulmasından bəri Koreya Respublikası və Azərbaycan dostluq əlaqələrini və qarşılıqlı faydalı tərəfdaşlığı ardıcıl şəkildə inkişaf etdirirlər" - bunu Cənubi Koreyanın Azərbaycandakı səfiri Kan Kimqu "Report"a müsahibəsində deyib.

"Bu gün bizim əməkdaşlığımız ticarət, mədəniyyət, təhsil və çoxtərəfli qarşılıqlı əməkdaşlıq da daxil olmaqla geniş sahələri əhatə edir. İnsanlar arasında əlaqələr əhəmiyyətli dərəcədə artıb. Bu isə cəmiyyətlərimizin bir-birinə dərin və səmimi marağını nümayiş etdirir. Hər iki ölkə beynəlxalq təşkilatlarda bir-birini fəal şəkildə dəstəkləyir. Bu da onların sülhə, davamlı inkişafa və qlobal əməkdaşlığa ümumi sadiqliyini əks etdirir.
Müxtəlif sektorlarda istifadə olunmamış mühüm potensialı, xalqlarımızın və institutlarımızın qarşılıqlı əlaqəyə açıq şəkildə hazır olmasını nəzərə alaraq, gələcək inkişaf üçün əhəmiyyətli imkanlar qalır" - deyə o, qeyd edib.

"Koreya Respublikası ilə Azərbaycan arasında münasibətlər son illərdə dinamik inkişaf edən, praqmatik və qarşılıqlı faydaya əsaslanan tərəfdaşlıq modeli üzrə formalaşıb", -bunu Sonxeber.az -a açıqlama verən politoloq Tural İsmayılov deyib:

"Siyasi dialoq sabitdir və yüksək səviyyəli təmaslar münasibətlərin institusional əsaslarını möhkəmləndirir. İki ölkə beynəlxalq platformalarda da bir-birinin mövqeyinə hörmətlə yanaşır. İqtisadi əməkdaşlıq münasibətlərin aparıcı istiqamətlərindən birinə çevrilib. Xüsusilə neft-kimya, energetika, tikinti və infrastruktur sahələrində Koreya şirkətləri Azərbaycanda uğurla fəaliyyət göstərir. Koreyanın qabaqcıl texnologiya və sənaye təcrübəsi Azərbaycanın modernləşmə strategiyası ilə uyğunluq təşkil edir. Nəqliyyat, "yaşıl enerji" və smart-city layihələri gələcək əməkdaşlıq üçün yeni imkanlar açır. Ticarət dövriyyəsi hələ potensiala tam uyğun olmasa da, artım dinamikası müsbət tendensiya göstərir. Humanitar sahədə də münasibətlər tədricən dərinləşir. Təhsil proqramları, tələbə mübadilələri və mədəni layihələr xalqlar arasında qarşılıqlı bağlılığı gücləndirir. Koreya modeli Azərbaycanda texnoloji inkişaf baxımından maraqla öyrənilir. Rəqəmsal transformasiya sahəsində təcrübə mübadiləsi xüsusi əhəmiyyət daşıyır. Azərbaycan regionun əsas geosiyasi və logistik mərkəzlərindən biri kimi Koreya üçün strateji əhəmiyyət kəsb edir. Ümumilikdə, mövcud mərhələdə Koreya-Azərbaycan münasibətləri stabil, perspektivli və uzunmüddətli əməkdaşlıq üçün möhkəm təməl üzərində inkişaf edir"

Telegramda izləyin