Fransa Prezident Sarayı da soyuldu: Boşqabları oğurlayıb internetdə satmaq istədilər

Luvr Muzeyində baş verən oğurluq qalmaqalı hələ gündəmdən düşməmişkən, Fransa bu dəfə Prezidentin rəsmi iqamətgahı olan Yelisey Sarayında (Élysée) baş verən oğurluq hadisəsi ilə sarsılıb.

Sonxeber.az xarici mediaya istinadən xəbər verir ki, Prokurorluq mənbələrindən verilən məlumata görə, Yelisey Sarayında keçirilən rəsmi yeməklər və qəbul mərasimlərində istifadə olunan süfrə dəstlərində zamanla ciddi çatışmazlıqlar aşkar edilib. Daxili yoxlamalardan sonra vəziyyət təhlükəsizlik qurumlarına bildirilib və iş Paris Prokurorluğunun nəzarəti ilə istintaqa cəlb olunub.

İtkin düşən əşyalar arasında Fransanın ən nüfuzlu istehsalları sırasında yer alan Sèvres istehsalı porselen boşqablar, fincanlar və müxtəlif süfrə ləvazimatlarının olduğu bildirilib. Qeyd olunub ki, bu əşyalar dövlət protokolunda istifadə edilən və rəsmi inventara daxil olan qiymətli əşyalardır.

Araşdırma çərçivəsində Yelisey Sarayında çalışan bir əməkdaş və daha iki nəfər barəsində hüquqi tədbir görülüb. Şübhəlilərdən birinin evində aparılan axtarış zamanı təxminən 100 ədəd porselen və süfrə əşyası aşkar edilərək götürülüb. Prokurorluğun açıqlamasına görə, müsadirə edilənlər arasında Sèvres porselenləri, Baccarat markalı qədəhlər və mis mətbəx əşyaları da var.

İstintaq materiallarında diqqət çəkən məqamlardan biri də bəzi əşyaların onlayn satış platformalarında satışa çıxarıldığının müəyyən edilməsi olub. Prokurorluq bu faktın araşdırma çərçivəsində qiymətləndirildiyini açıqlayıb.

Telegramda izləyin