Aylardır fasiləsiz öskürür, səbəbi tapılmır - VİDEO

Batman şəhər mərkəzində yaşayan Arı ailəsinin 13 yaşlı oğlu Məhəmməd Eyüp Arı artıq 51 gündür öskürəkdən əziyyət çəkir.

Sonxeber.az türk mediasına istinadən xəbər verir ki, gecə-gündüz davam edən öskürək tutmaları azyaşlının həyatını demək olar ki, dözülməz hala gətirib.

Məlumata görə ailə övladlarını dəfələrlə müxtəlif xəstəxanalara və həkimlərə aparıb. Məhəmməd bir neçə dəfə stasionar müalicəyə yerləşdirilsə də, tətbiq olunan dərman və müalicə üsulları qalıcı nəticə verməyib. Ailənin bildirdiyinə görə, xəstəxanada nəzarət altında olduğu müddətdə öskürək nisbətən azalsa da, evə buraxıldıqdan cəmi bir gün sonra yenidən əvvəlki şiddətlə başlayır.

Övladlarının gözləri önündə əziyyət çəkməsinə dözə bilmədiklərini deyən ailə çıxış yolunu itirdiklərini bildirir. Onlar açıqlamalarında qeyd ediblər:
"13 yaşlı övladımız çox ağır şəkildə öskürür, demək olar ki, dayanmır. Onu dəfələrlə həkimə apardıq, amma heç bir nəticə əldə edə bilmədik. Xəstəxanada müalicə alır, evə qayıdan kimi isə ertəsi gün hər şey yenidən başlayır. Artıq 50 gündür bu əzabı yaşayırıq. Çarəsiz qalmışıq, nə edəcəyimizi bilmirik".

Ailə övladlarının vəziyyətinin dəqiq səbəbinin müəyyən edilməsi və effektiv müalicə üçün aidiyyəti qurumlardan kömək gözləyir.

Telegramda izləyin