"Xızı-Abşeron" Külək Elektrik Stansiyası Azərbaycanın etibarlı tərəfdaş və gələcək qurucusu olduğunu bir daha sübut etdi" - DEPUTAT

Yanvarın 8-də Bakıda keçirilən "Xızı-Abşeron" Külək Elektrik Stansiyasının rəsmi açılış mərasimi Azərbaycanın enerji strategiyasında yeni və mühüm mərhələnin başlanğıcı kimi tarixə yazıldı. 240 MVt gücündə bu stansiyanın istismara verilməsi təkcə texniki nailiyyət deyil, dövlətimizin gələcəyə hesablanmış, düşünülmüş siyasətinin real nəticəsidir.

Möhtərəm Cənab Prezident İlham Əliyevin çıxışında səsləndirdiyi fikirlər bir daha təsdiqlədi ki, Azərbaycan enerji sahəsində istehsalçı olmaqla yanaşı, eyni zamanda innovasiya, etibarlılıq və dayanıqlılıq modeli təqdim edən ölkəyə çevrilir. Son iyirmi ildə enerji sistemimizin demək olar ki, tam yenilənməsi, generasiya güclərinin üç dəfədən çox artaraq 10 min meqavat səviyyəsinə çatması strateji baxışın nəticəsidir. Bu gün bərpaolunan enerji istiqamətində atılan addımlar həmin strategiyanın məntiqi davamıdır.

"Xızı-Abşeron" Külək Elektrik Stansiyası Səudiyyə Ərəbistanının aparıcı enerji şirkəti olan ACWA Power tərəfindən inşa edilib və bu fakt Azərbaycanın beynəlxalq investisiya mühitinə olan yüksək etimadın bariz göstəricisidir. Layihənin həyata keçirilməsində Çin Xalq Respublikasının şirkətlərinin də fəal iştirakı ölkəmizin çoxtərəfli əməkdaşlıq modelinin uğurla işlədiyini nümayiş etdirir və biz üç ölkəni birləşdirən tərəfdaşlığın real nəticəsini görürük.

Xüsusi olaraq qeyd etmək lazımdır ki, gələcək illərdə Səudiyyə Ərəbistanının dəstəyi əsasında dəniz suyunun duzsuzlaşdırılması ilə bağlı qurulacaq mərkəz ölkəmizin içməli suya olan tələbatını, eyni zamanda kənd təsərrüfatında davamlı su təminatını yaxşılaşdıracaq mühüm layihədir.

Açlışı həyata keçirilən "Xızı-Abşeron" Külək Elektrik Stansiyası eyni zamanda Azərbaycanın yaşıl enerjiyə keçid siyasətinin ifadəsidir. Bərpaolunan enerji mənbələrinin genişləndirilməsi daxili tələbatın etibarlı təminatı ilə yanaşı, elektrik enerjisinin ixrac potensialını da artırır, enerji təhlükəsizliyimizi daha da möhkəmləndirir. Xüsusilə Xəzər dənizinin nəhəng külək potensialının mərhələli şəkildə reallaşdırılması ölkəmizi regionun aparıcı təmiz enerji mərkəzinə çevirəcək.

Biz bilirik ki, bundan əvvəl Azərbaycan Gürcüstan, Rumıniya və Macarıstan əhatə edən Qara dənizin dibi ilə keçəcək elektrik xəttinin layihəsini reallaşdırır. Bütün bunlar görülən işlərin miqyasının göstəricisidir.

Ölkə başçımızın vurğuladığı kimi, yaxın illərdə batareya enerji saxlanclarının yaradılması, Günəş və külək stansiyalarının sayının artması Azərbaycanın enerji xəritəsini tamamilə yeni keyfiyyət mərhələsinə çıxaracaq. Proses iqtisadi dividendlər, ekoloji məsuliyyət, gələcək nəsillərə sağlam mühit mirası deməkdir.

Qürurla qeyd etməliyik ki, "Xızı-Abşeron" Külək Elektrik Stansiyası Azərbaycanın sözün həqiqi mənasında etibarlı dövlət, etibarlı tərəfdaş və etibarlı gələcək qurucusu olduğunu bir daha sübut etdi. Atılan addımlar, görülən işlər güclü, dayanıqlı və müasir Azərbaycanın sabahına hesablanmış strateji yol xəritəsidir.

Günay Ağamalı

Milli Məclisin deputatı, Ana Vətən Partiyasının sədr müavini.

Telegramda izləyin