"Məhz bu faktor Vaşinqtonu ehtiyyatla hərəkət etməyə sövq edir" - AÇIQLAMA

"ABŞ prezidenti Donald Trampın İranla bağlı açıqlaması rəsmi Vaşinqtonun İslam ölkəsində baş verən proseslərə müdaxilə etmək ehtimalının göstəricisidir. Bilindiyi kimi, İranda daxili siyasi vəziyyət hazırda olduqca mürəkkəbdir və baş verən hadisələr məhz rejimin zaman - zaman etdiyi səhvlərin nəticəsidir. İndiki situasiyada Birləşmiş Ştatların İrana mümkün müdaxiləsi riskli bir yanaşmadır. Çünki hər hansı bir hərbi addım regionda domino effekti yarada bilər və bundan bütün bölgə dövlətləri ciddi zərər görər. Təbii ki, hal hazırda keçirilən etirazlar fonunda rejimin legitimliyi sual altındadır və çox güman ki, hadisələr bu minvalla davam edərsə İranda rejim dəyişikliyinin şahidi olacıq".

Bunu Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, belə bir məqamda Birləşmiş Ştatların mövqeyi, sərgilədiyi ritorika heçdə İran xalqının qayğılarından qaynaqlanan məqamlar üzərindən deyil:

"Mahiyyət tamamilə fərqlidir. Vaşinqton rəsmiləri İranda nüvə proqramını dayandırmağı tələb edir və əllərindəki zənginləşdirilmiş uranı ələ keçirmək istəyir. Çünki 60 faiz zəngiləşdirilmiş uran o deməkdir ki, cənub qonşumuz nüvə silahının bir addımlığındadır və bu situasiya ABŞ-İsrail birliyi üçün ən arzuolunmaz ssenaridir.

Əgər aksiyalar çərçivəsində Birləşmiş Ştatlar hələ də İrana hərbi müdaxilə etmirsə bunun əsas səbəbi məhz geosiyasi dinamika ilə bağlıdır. Yəni, hər hansı bir hərbi hərəkətlilik aksiyaların mahiyyətini dəyişə bilər və rejimin irəli sürdüyü arqumentləri əsaslandırar. Məhz bu faktor Vaşinqtonu ehtiyyatla hərəkət etməyə sövq edir".

Vüsalə İbrahimli

Telegramda izləyin