"Azərbaycan üçün Serbiya Balkan regionunda önəmli tranzit və tərəfdaş ölkədir" - AÇIQLAMA

Azərbaycan Prezidenti İlham Əliyevin Serbiyaya səfəri iki xalq üçün yeni əməkdaşlıq və rifah imkanları açır.

Bunu Serbiya Prezidenti Aleksandar Vuçiç Azərbaycan Prezidenti İlham Əliyevin bu ölkəyə səfəri ilə bağlı paylaşımında qeyd edib.

"Mənim üçün Azərbaycan Prezidenti İlham Əliyevi qəbul etmək və birlikdə Serbiya ilə Azərbaycan arasında hərtərəfli münasibətlərin möhkəmləndirilməsi istiqamətində çalışmaq böyük şərəf oldu. Bu səfər xalqlarımız üçün yeni əməkdaşlıq və rifah imkanları açan ortaq dəyərlərimizin və baxışlarımızın təsdiqidir. Əziz dostum, səfəriniz üçün təşəkkür edirəm! Tezliklə yenidən görüşmək ümidi ilə!", - deyə o qeyd edib.

"İlham Əliyev-in Serbiya-ya rəsmi səfəri və bu çərçivədə müxtəlif sahələri əhatə edən sənədlərin imzalanması Azərbaycan-Serbiya münasibətlərinin yeni mərhələyə qədəm qoyduğunu göstərir", - bunu Sonxeber.az -a açıqlama verən politoloq Tural İsmayılov deyib:

"Bu səfər iki ölkə arasında əlaqələrin artıq strateji tərəfdaşlıq səviyyəsində formalaşdığını nümayiş etdirən mühüm siyasi hadisə kimi qiymətləndirilir. İmzalanan sazişlər enerji, nəqliyyat, ticarət, mədəniyyət və təhsil istiqamətlərində əməkdaşlığı daha sistemli və institusional çərçivəyə salır.

Azərbaycan üçün Serbiya Balkan regionunda önəmli tranzit və tərəfdaş ölkədir. Bu əməkdaşlıq Avropaya çıxış imkanlarını genişləndirir, enerji resurslarının şaxələndirilməsi və yeni bazarlara inteqrasiya baxımından strateji əhəmiyyət daşıyır. Serbiya üçün isə Azərbaycan enerji təhlükəsizliyinin təmin olunmasında etibarlı alternativ mənbə olmaqla yanaşı, investisiya və iqtisadi əməkdaşlıq baxımından da perspektivli tərəfdaşdır.

Hər iki ölkənin beynəlxalq platformalarda bir-birinin ərazi bütövlüyünü dəstəkləməsi münasibətlərin siyasi təməlini daha da möhkəmləndirir. Bu qarşılıqlı dəstək diplomatik münasibətlərdə etimadı artırır və tərəflərin mövqelərini gücləndirir.

İqtisadi sahədə qarşılıqlı investisiya imkanlarının artması, biznes əlaqələrinin genişlənməsi və humanitar əməkdaşlığın dərinləşməsi xalqlar arasında yaxınlaşmanı sürətləndirir, uzunmüddətli tərəfdaşlıq üçün möhkəm sosial baza formalaşdırır.

Ümumilikdə, səfərin strateji mahiyyəti ondan ibarətdir ki, Azərbaycan Balkanlarda mövqeyini daha da gücləndirir, Serbiya isə enerji və iqtisadi şaxələndirmə istiqamətində yeni imkanlar əldə edir. Nəticə etibarilə, münasibətlər qarşılıqlı fayda prinsipi əsasında daha dayanıqlı və perspektivli əməkdaşlıq mərhələsinə yüksəlir".

Telegramda izləyin