Altsheymer xəstəsi ana oğlunu tanımadığı üçün evə buraxmadı - VİDEO

Türkiyənin Aksaray şəhərində baş verən hadisə həm kədərli, həm də diqqət çəkən anlarla yadda qalıb.

Sonxeber.az türk mediasına istinadən xəbər verir ki, Altsheymer xəstəsi anası ilə yaşayan 53 yaşlı Rahim Ergün gecə saatlarında evə qayıdarkən gözlənilməz vəziyyətlə üzləşib. Onun sözlərinə görə, 80 yaşlı anası xəstəliyi səbəbindən onu tanımayıb və qapını açmaqdan imtina edib. Kişi saatlarla qapı qarşısında gözləsə də, anasını razı sala bilməyib.

Çıxılmaz vəziyyətdə qalan Rahim Ergün 112 təcili yardım xəttinə müraciət edib. Hadisə yerinə polis və yanğınsöndürən briqadaları cəlb olunub. Polis əməkdaşları qapıdan yaşlı qadını razı salmağa çalışsa da, nəticə əldə olunmayıb.

Daha sonra yanğınsöndürənlər xüsusi nərdivan vasitəsilə binanın ikinci mərtəbəsindəki mənzilin eyvanına qalxıblar. Rahim Ergün də həmin nərdivan vasitəsilə açıq pəncərədən mənzilə daxil olmağı bacarıb. Lakin yaşlı qadın onu yenə tanımadığı üçün qısa müddət sonra yenidən evdən çıxarıb.

Bir müddət sonra polis əməkdaşlarının müdaxiləsi ilə yaşlı qadın sakitləşdirilib. Qadın sonradan oğlunu xatırlayıb və onu yenidən evə qəbul edib. Hadisə ətrafdakı şəxslər tərəfindən mobil telefonla lentə alınıb.

Telegramda izləyin