Avtomobilində yuxuya gedən kişi, oyananda görmə qabiliyyətini itirdi - VİDEO

Türkiyənin Sakarya şəhərində avtomobilinin oturacaqlarını təmizlədikdən sonra maşında yuxuya gedən 45 yaşlı Yasin Kurtun həyatı bir gecədə dəyişib. Kimyəvi buxar və karbonmonoksit qazından zəhərlənən iki uşaq atası görmə qabiliyyətinin böyük hissəsini itirib.

Sonxeber.az xarici mediaya istinadlla xəbər verir ki, əvvəllər Qaziantepdə marketinq müdiri kimi çalışan Yasin Kurt şirkəti iflas etdikdən sonra ailəsi ilə birlikdə Sakaryaya köçüb. O, ötən ilin noyabr ayında avtomobilinin oturacaqlarını təmizləyərkən başlayan yağış səbəbindən maşında gözləməyə qərar verib. Oturacaqların tez quruması üçün avtomobili işlək vəziyyətdə saxlayaraq sobanı yandıran Kurt bir müddət sonra yuxuya gedib.

Təxminən iki saat bağlı maşında qalan kişi kimyəvi buxar və avtomobilə sızdığı ehtimal edilən karbonmonoksit qazından ağır zəhərlənib. Vəziyyəti pisləşən Yasin Kurt xəstəxanaya yerləşdirilib və bir müddət reanimasiyada qalıb. Həkimlər onun sağ qalma şansının çox az olduğunu bildirsələr də, o, həyata tutuna bilib.

Lakin ağır zəhərlənmə nəticəsində görmə qabiliyyətinin təxminən 90 faizini itirən Kurt uzun müalicədən sonra qismən hərəkət qabiliyyətini bərpa edib. Hazırda Eskişehirdə yaşayan və iki uşaq atası olan Yasin Kurt yenidən işləmək və həyatını davam etdirmək üçün iş axtardığını bildirib.

Telegramda izləyin