ABŞ-Çin münasibətlərində yeni mərhələ: Dünyanı nə gözləyir? - POLİTOLOQDAN AÇIQLAMA

ABŞ ilə Çin arasında münasibətlər son illərdə təkcə iki ölkənin deyil, bütün dünyanın diqqət mərkəzindədir. Ticarət müharibələri, texnologiya sahəsində rəqabət, Tayvan ətrafında artan gərginlik və qlobal təsir uğrunda mübarizə Vaşinqton-Pekin xəttini beynəlxalq gündəmin əsas mövzularından birinə çevirib.

Bu münasibətlərdə atılan hər bir addım dünya iqtisadiyyatına, təhlükəsizlik mühitinə və beynəlxalq siyasətin gələcək istiqamətinə təsir göstərir. Bəs ABŞ-Çin münasibətlərində hazırkı vəziyyət necə qiymətləndirilir və qarşıdakı dövrdə hansı ssenarilər ön plana çıxa bilər?

Mövzu ilə bağlı politoloq Rəsul Tağıyev Sonxeber.az-a açıqlamasında bildirdi ki, ABŞ və Çin arasında münasibətlər artıq yalnız ikitərəfli əlaqələr çərçivəsində qiymətləndirilmir. Söhbət dünyanın iki ən böyük iqtisadi və hərbi gücü arasında strateji rəqabətdən gedir. Onun sözlərinə görə, tərəflər ticarət, süni intellekt, yarımkeçiricilər, hərbi texnologiyalar və Hind-Sakit okean regionunda təsir imkanlarını artırmağa çalışırlar: "Bununla yanaşı, Vaşinqton və Pekin açıq qarşıdurmadan da yayınmağa çalışır. Çünki belə bir ssenari qlobal iqtisadiyyata ciddi zərbə vura, təchizat zəncirlərini poza və maliyyə bazarlarında qeyri-sabitliyi daha da dərinləşdirə bilər. Bu səbəbdən rəqabət davam etsə də, tərəflərin dialoq kanallarını açıq saxlaması beynəlxalq sabitlik baxımından mühüm əhəmiyyət daşıyır.

Yaxın perspektivdə ABŞ-Çin münasibətlərində tam normallaşma gözlənilmir. Əksinə, strateji rəqabət davam edəcək, lakin bunun idarəolunan çərçivədə saxlanılması hər iki tərəfin maraqlarına uyğundur".

Telegramda izləyin