İlham Əliyevin "Ali Dostluq" ordeni ilə təltif edilməsi münasibətlərin qardaşlıq səviyyəsində olduğunun göstəricisidir - AÇIQLAMA

Özbəkistan Prezidenti Şavkat Mirziyoyevin Azərbaycan Prezidenti İlham Əliyevi "Ali dərəcəli Dostluq" ordeni ilə təltif etməsi iki ölkə arasında münasibətlərin yüksək səviyyəsinin növbəti siyasi göstəricisi kimi diqqət çəkir. Təltif Prezident Əliyevin Azərbaycan-Özbəkistan əlaqələrinin inkişafına verdiyi töhfənin yüksək qiymətləndirilməsi kimi təqdim olunub.

Bəs, bu təltif Azərbaycan-Özbəkistan münasibətlərinin strateji tərəfdaşlıq və müttəfiqlik səviyyəsinə yüksəlməsinə verilən siyasi qiymət kimi necə dəyərləndirilə bilər və bu münasibətlərin gələcəkdə daha da möhkəmlənməsinə hansı təsirləri göstərə bilər?
Sonxeber.az-a açıqlama verən "Müasir İnkişaf" İctimai Birliyinin sədri, Crossmedia.az saytının baş redaktoru, siyasi şərhçi Mübariz Göyüşlü bildirib ki, Azərbaycan Prezidentinin Özbəkistana növbəti dövlət səfəri, burada Şavkat Mirziyoyevlə keçirilən görüş, verilən açıqlamalar və imzalanan sənədlər iki dövlət arasında əlaqələrin inkişaf səviyyəsinin göstəricisidir.

"Mən hesab edirəm ki, burada hər iki prezidentin şəxsi münasibətləri və eyni zamanda hər iki prezident tərəfindən həyata keçirilən çalışmalar Azərbaycan-Özbəkistan münasibətlərini bu cür yüksək səviyyəyə gətirib çıxarıb. Azərbaycan özünə növbəti dost və qardaş ölkə ilə çox ciddi, sıx müttəfiqlik və əməkdaşlıq münasibətləri quraraq fəaliyyətini davam etdirir. Eyni zamanda, İlham Əliyevin Özbəkistan Prezidenti tərəfindən "Ali Dostluq" ordeni ilə təltif edilməsi münasibətlərin hazırkı səviyyəsinin ali dostluq və qardaşlıq münasibətləri səviyyəsində olduğunun göstəricisidir".

Ekspert bildirib ki, bu təltif iki ölkənin strateji tərəfdaşlıq və müttəfiqlik əlaqələrinin daha da möhkəmlənməsinə və inkişafına gətirib çıxaracaq:

"Bu, münasibətlərdə yeni bir səhifənin açılması ilə nəticələnəcək. Biz gələcəkdə bu münasibətlərin, həmçinin bu mükafatlandırmanın və bundan sonra görüləcək işlərin faydalı nəticələrini görəcəyik".

Röyalə Xəyal

Telegramda izləyin