Prezidentin Özbəkistana səfəri türk dünyasının inkişafına ciddi töhfə verəcək

Prezident İlham Əliyevin Özbəkistana dövlət səfəri iki ölkə arasında son illərdə sürətlə inkişaf edən münasibətlərin fonunda xüsusi əhəmiyyət daşıyır. Azərbaycan və Özbəkistan arasında siyasi dialoqla yanaşı, iqtisadi, nəqliyyat və digər sahələrdə əməkdaşlığın genişlənməsi Mərkəzi Asiya ilə əlaqələrin də möhkəmlənməsinə yeni imkanlar yaradır.

Bəs, bu səfər Azərbaycan-Özbəkistan müttəfiqlik münasibətlərinin möhkəmlənməsinə və Azərbaycanın Mərkəzi Asiya ilə siyasi-strateji əməkdaşlığının genişlənməsinə necə təsir göstərə bilər?

Sonxeber.az-a açıqlama verən Ədalət, Hüquq, Demokratiya (ƏHD) Partiyası İdarə Heyətinin üzvü, siyasi şərhçi Əli Zülfüqaroğlu bildirib ki, Prezident İlham Əliyevin Özbəkistana səfəri tarixi hadisədir.

"Səfər çərçivəsində mühüm razılaşmaların əldə olunması, iqtisadiyyatın bir sıra istiqamətlərində sazişlərin imzalanması iki ölkə arasındakı əlaqələri mühüm mərhələyə daşıyır. Diqqətçəkən mühüm məqamlardan biri "Əbədi dostluq haqqında Müqavilə"nin imzalanmasıdır. Azərbaycan Cənubi Qafqazın, Özbəkistan isə Mərkəzi Asiyanın önəmli və ciddi iqtisadi potensialı olan ölkələridir. Əldə olunan razılaşmalar regionlar arasında əlaqələrin inkişafı ilə yanaşı, türk dünyası arasında əlaqələrin daha da inkişafına təkan verəcək".

Ekspert bildirib ki, gün Azərbaycan türk dünyasının aparıcı ölkəsidir:

"Azərbaycan Prezidenti tərəfindən irəli sürülən təşəbbüslər türk dövlətləri tərəfindən dəstəklənir və bu proses bütövlükdə türk dünyasında iqtisadi, siyasi, mədəni və digər istiqamətlərdə inteqrasiyanı dərinləşdirir. İndiyə qədər Azərbaycan tərəfindən bu istiqamətdə effektiv addımlar atılıb. Azərbaycan-Özbəkistan arasında əlaqələrin dərinləşməsi təkcə iki ölkə arasında münasibətlərin deyil, bütövlükdə türk dünyasında əlaqələrin dərinləşməsi deməkdir. Ona görə də hesab edirəm ki, Özbəkistan-Azərbaycan münasibətləri və Azərbaycan Prezidentinin Özbəkistana səfəri iki ölkə arasındakı əlaqələri strateji müttəfiqlik səviyyəsinə yüksəltməklə yanaşı, bütövlükdə türk dünyasının inkişafına ciddi töhfə verəcək".

Röyalə Xəyal

Telegramda izləyin