Almaniya xüsusi təyinatlı qüvvələrini Rusiya ilə mümkün münaqişəyə hazırlayır

Almaniya Bundesverinin xüsusi təyinatlı qüvvələri Rusiya ilə mümkün hərbi münaqişəyə hazırlıq keçir.
Bizimyol.info xəbər verir ki, bu barədə "Bild" qəzeti briqada komandiri Andreas Künəyə istinadən məlumat yayıb.

Künenin sözlərinə görə, hazırlıq konkret rəqibə - Rusiyaya qarşı yönəlib. Hərbçilər uzunmüddətli əməliyyatlar keçirmək üçün təlimlərə cəlb olunur. Təlimlər zamanı tanklara, artilleriyaya, pilotsuz uçuş aparatlarına və radioelektron mübarizə vasitələrinə qarşı fəaliyyət, eləcə də kəskin soyuq şəraitdə əməliyyatların aparılması məşq edilir.

Nəşrin məlumatına görə, bölmədə təxminən 1 500 nəfər xidmət edir. Onların yalnız üçdə biri xüsusi təyinatlı hərbçilərdir, qalanları isə inzibati heyətdir. Ştat komplektləşdirilməsi 70-80 faiz səviyyəsindədir.

"Bild" xatırladır ki, həmin bölmə əvvəllər sağçı ekstremistlərlə bağlı insidentlər, nasist salamları, eləcə də sursatların itməsi və hərbçilərdən birinin yanında silah-sursat və partlayıcı maddələrin aşkar edilməsi kimi qalmaqallarda hallanıb.

Moskva isə Rusiyanın NATO ölkələrinə hücum etmək planlarının olması barədə iddiaları dəfələrlə təkzib edib. Rusiya prezidenti Vladimir Putin Qərb siyasətçilərinin bu cür bəyanatlarını əhalini qorxutmaq və hərbi xərclərin artırılmasına haqq qazandırmaq cəhdi kimi qiymətləndirib.

Rusiya prezidentinin mətbuat katibi Dmitri Peskov da NATO-nun sürətli hərbiləşmə yolunu tutduğunu bildirib. Onun sözlərinə görə, Rusiyanın "təhlükə" kimi təqdim edilməsi alyans üzvlərinin müdafiə xərclərini ÜDM-in 5 faizinə çatdırmaq qərarını əsaslandırmaq üçün istifadə olunur.

Telegramda izləyin