Qızılın qiyməti yenidən bahalaşacaq? - İQTİSADÇIDAN AÇIQLAMA

Qızıl son illərdə investorların diqqət mərkəzində olsa da, qiymətindəki kəskin dəyişikliklər bazarda qeyri-müəyyənliyi artırır. Oktyabrın sonlarında dünya bazarında qızılın qiyməti 4 000 dollar həddinə yaxınlaşıb və bu, qiymətlərin gələcək istiqaməti ilə bağlı suallar yaradıb. Bəs qızılın bahalaşması yenidən sürətlənəcək, yoxsa qiymətlərdə eniş müşahidə olunacaq?

Dünya iqtisadiyyatındakı proseslər, dolların məzənnəsi və mərkəzi bankların qızıl alışları bazara necə təsir göstərəcək?
Mövzu ilə bağlı Liberal İqtisadçılar Mərkəzinin sədri Akif Nəsirli Sonxeber.az-a açıqlamasında bildirdi ki, qızılın qiymətinin bahalaşmasının davam edib-etməyəcəyi bir neçə əsas amildən asılıdır. İlk növbədə, dünya iqtisadiyyatında qeyri-müəyyənlik, geosiyasi gərginliklər, ABŞ dollarının məzənnəsi, faiz dərəcələri və mərkəzi bankların qızıl alışları qiymətə ciddi təsir göstərir. İnvestorlar risklərin artdığı dövrlərdə vəsaitlərinin bir hissəsini qızıla yönəltdikləri üçün bu metal ənənəvi olaraq qoruyucu investisiya vasitəsi hesab olunur. Lakin son məlumatlar göstərir ki, qızılın qiymətində artım fasiləsiz deyil. Reuters-in 27 oktyabr 2026-cı il tarixli sorğusuna əsasən, analitiklər 2026-cı il üçün orta qiymət proqnozunu bir troya unsiyası üzrə 4 495 dollara endirsələr də, 2027-ci ildə 4 650 dollara yüksələcəyini gözləyirlər.

Mənim fikrimcə, orta və uzun müddətli perspektivdə qızılın bahalaşması üçün əsaslar qalır. Mərkəzi bankların qızıl ehtiyatlarını artırması, geosiyasi risklər və dövlət borcları ilə bağlı narahatlıqlar qiymətə dəstək verə bilər. Ancaq ABŞ-da faizlərin yüksək qalması və dolların möhkəmlənməsi qiymət artımını ləngidə, hətta müvəqqəti ucuzlaşmaya səbəb ola bilər.

Buna görə qızılın qiymətinin mütləq artacağını söyləmək düzgün olmaz. Qızılı uzunmüddətli yığım vasitəsi kimi alanlar üçün yanaşma ilə qısa müddətdə qiymət fərqindən qazanc əldə etmək istəyənlərin yanaşması fərqli olmalıdır. Xüsusilə qiymət rekord səviyyələrə yaxın olduqda bütün vəsaiti birdəfəyə qızıla yatırmaq risklidir. Qızıl almağı düşünənlər üçün alışları mərhələli etmək və ehtiyat vəsait saxlamaq daha ehtiyatlı yanaşmadır.

Müəllif: İlkin Məmmədkərimov

Telegramda izləyin